Көкшетау қаласының Қоғамдық кеңесінің кезекті отырысы

---

Ағымдағы жылдың 26 шілдесінде Көкшетау қаласы Қоғамдық кеңесінің отырысына қатыстым. Отырыста  «Көкшетау қаласының жер қатынастары, сәулет және қала құрылысы бөлімі» мемлекеттік мекемесінің басшысы Айнұр Танкыбаева жер қатынастары, сәулет және қала құрылысы саласында мемлекеттік қызмет көрсету мәселелері бойынша тыңдалды.

Өз баяндамасында А.Ж. Танкыбаева бөлімнің көрсететін қызмет түрлері және  проблемалық мәселелерді, яғни  жер телімдерін басқа мақсаттарға пайдалану сияқты, қаланың сыртқы келбетіне әсер ететін сауда павильондарын өз ғимараттарының алдына жиі орнату жағдайларын, сондай-ақ жер заңнамасында ұзақ жылдар бойы қоршалған немесе тек қана іргетас тұрғызған жеке тұрғын үй құрылысына жер телімдерін игеру мерзімдерінің жоқтығын айтты.  Менің  қазір мұндай учаскілер қанша деген сұрағыма «Бірлік» шағын ауданы бойынша 100-ге жуық учаске деп жауап берілді. Өздеріңіз білетіндей, 2016-2017 жылдар аралығында жер телімдері берілмеген, бүгінде бөлімнің  мәліметінше, 300 учаскені бөлу жоспарланып отыр. Қоғамдық кеңес мүшелерінің орталықтандырылған кәріз жүйесінің бар-жоғы туралы нақтылаушы сұрағына «жоқ» деп жауап берілді.

Сондай-ақ, мен мәслихат аппаратына Көкшетау қаласы Қоғамдық кеңесінің хаттамалық ұсыныстарын талдауды тапсырдым.

Отырыстың күн тәртібін талқылағаннан кейін Қоғамдық кеңес мүшелері жер қатынастары саласындағы мемлекеттік қызметтердің сапасын арттыру бойынша ұсыныстар енгізді.