АКВАӨСІРУ. ИНВЕСТИЦИЯЛЫҚ ЖОБАЛАР.

---

Акваөсіру - балық ресурстарының және басқа да су жануарларының өсімін жасанды жолмен молайту және өсіру.

Асыл тұқымды балық шаруашылығы - балықтардың тұқым қуалаушылық қасиеттерін жақсартуға және өнімділігін арттыруға бағытталған балық өсіру іс-шараларының кешені болып табылады.

Өңірімізде балық шаруашылығы қызметімен көптеген кәсіпкерлер айналысып келеді.

«Акваөсіру өнімінің өнімділігі мен сапасын арттыруды, сондай-ақ асыл тұқымды балық өсіруді дамытуды субсидиялау қағидаларына» сәйкес субсидиялар жергілікті бюджетте тиісті қаржы жылына көзделген қаражат есебінен төленеді.

Аталған мақсатта 2023 жылы акваөсіруге субсидиялар көлемін бекіту туралы облыс әкімдігінің табиғи ресурстар және табиғатты реттеу басқармасы әзірлеген қаулы жобасы облыстық Қоғамдық кеңестің отырысында тамыз айында қаралған болатын.

Басқарманың мәліметі бойынша Жамбыл облысының аумағында акваөсіруді дамыту мақсатында жалпы сомасы 1,4 млрд.теңге қуаттылығы 1402 тонна өсіретін және 1156 тонна өңдейтін 21 инвестициялық жобаны іске асыру жоспарланған.

Оның ішінде 9 шаруашылық карп балығын, 9 шаруашылық форель балығын, 1 шаруашылық африкалық жайын балығын, 2 шаруашылық бекіре балығын өсіреді.

Жамбыл, Байзақ, Жуалы, Қордай, Меркі, Т. Рысқұлов,Шу, Мойынқұм аудандары бойынша аталған жобалар жүзеге асырылуда.

Қоғамдық кеңестің мониторингтік топ мүшелері Ә. Зәуірбеков, Н. Сұлтанбаев, Ж.Орынбаева 7 қараша күні инвестжобаның басым бөлігі ( 8 жоба) іске асырылатын Жамбыл ауданының Жасөркен ауылында қоғамдық мониторинг жүргізді.

Талас өзенінің бойында ЖК “Айжан”, ЖК “Янтарь”, ЖК”Садырбаев” ұйымдастырған балық шаруашылығы 6 га жер аумағында орналасқан. Жеке кәсіпкерлерге 30-50 млн. теңге субсидиялар беріліп, 6 бассейн, 1 инкубациялық цех салынған, форель шабағын өсіру, форель балығын өндіру жүргізілуде.

Мониторинг барысында кеңес мүшелері акваөсірудің жай-күйімен танысып, субсидияның мақсатты жұмсалуын, шаруашылықты дамыту проблемаларын зерделеді.

Атап айтқанда, балықтың азығын дайындау цехын ашу үшін жер телімі қажет. Бұл мәселе шешімін таппай отыр.

Шаруашылық орналасқан аумақ инфрақұрылыммен: жол, газ, жарық, жылумен қамтамасыз етілмеген.

Өңіріміздің экономикасын дамытуға пайдасы зор инвестициялық жобаларға ҚК тарапынан қоғамдық мониторинг жүргізу алдағы уақытта жалғасатын болады.