ДИПЛОММЕН АУЫЛҒА

---

Қосшы қалалық Қоғамдық кеңесінің отырысында қала мәслихатының «Тайтөбе ауылына жұмыс істеуге және тұруға келген денсаулық, білім беру, әлеуметтік қамсыздандыру, мәдениет, спорт және агроөнеркәсіптік кешен саласындағы мамандарға, ауылдық округ әкімі аппаратының мемлекеттік қызметшілеріне көтерме жәрдемақы және тұрғын үй сатып алуға немесе салу үшін бюджеттік кредит түрінде әлеуметтік қолдау шараларын 2024 жылы ұсыну туралы» шешімінің жобасы талқыланған болатын. Бұл мәселе бойынша қала әкімінің орынбасары Ибраева Альмира Бақытқызы ақпарат бере отырып, жыл сайын Тайтөбе ауылы бойынша сұранысқа ие мамандардың тізімі қалыптастырылатынын атап өтті.

2009 жылдың 1 шілдесінен бастап жүзеге асып жатқан «Дипломмен ауылға» мемлекеттік бағдарламасы бойынша мамандарға тұрғын үй сатып алу немесе салу үшін көтерме жәрдемақы немесе бюджеттік кредит түрінде әлеуметтік қолдау шаралары ұсынылады.

БҰЛ БАҒДАРЛАМАҒА КІМДЕР ҚАТЫСА АЛАДЫ?
Елді мекенге жұмыс жасауға және тұруға келген денсаулық сақтау, білім беру, әлеуметтік қамсыздандыру, мәдениет, спорт, агроөнеркәсіптік кешен мамандары, ауылдық округтер әкімдері аппараттарының мемлекеттік қызметшілері (әкімдер мен әкімдердің орынбасарларын қоспағанда) қатыса алады.

ҚАНДАЙ ТАЛАПТАРЫ БАР?
Маманға қойылатын негізгі талап осы ауылдық елді мекенде орналасқан ұйымда тиісті мамандық бойынша кемінде үш жыл жұмыс істеуге өзіне міндеттеме қабылдауы керек.

ҚАНДАЙ КӨЛЕМДЕ ӘЛЕУМЕТТІК ЖЕҢІЛДІКТЕР ҚАРАСТЫРЫЛҒАН?
Мамандарға 100 АЕК мөлшерінде көтерме жәрдемақы төлеу көзделеді, сондай-ақ тұрғын үйді (жұмыс орны бойынша) сатып алуға немесе салуға 2 000 АЕК аспайтын мөлшерде әлеуметтік қолдау шаралары бойынша он бес жылға дейінгі мерзімге сыйақы мөлшерлемесі жылдық 0,01% пен ресімдеу мүмкіндігі қарастырылады.
Биылғы, 2024 жылы АЕК бойынша бір маманға көтерме жәрдемақы 369,2 мың теңге, тұрғын үй сатып алу үшін бюджеттік кредит 7 384,0 мың теңге қарастырылды. 2024-2026 жылдарға бекітілген бюджетте жергілікті бюджеттен 10 маманға көтерме жәрдемақы төлеуге 3 692,0 мың теңге қарастырылған. Республикалық бюджеттен тұрғын үй сатып алу немесе тұрғын үй салу үшін 1 маманға 7 384,0 мың теңге көлемінде бюджеттік кредит бөлінді. Көтерме жәрдемақы мен бюджеттік кредитке бір мезгілде өтініш беруге болады.

ЕСКЕРТУ!
Егер еңбек қатынастары үш жылға жетпей тоқтатылатын болса бюджет қаражаты толық көлемде қайтарылады. Өтінімдер жылжымайтын мүлік otbasybank.kz. порталында онлайн режимде қабылданатын болады.