Жамбыл облыстық Қоғамдық кеңесінің отырысында ҚР Сыбайлас жемқорлыққа қарсы іс-қимыл агенттігінің Жамбыл облысы бойынша департаментінің білім беру саласында бюджет қаражатын жоспарлау және игеру процессіндегі ұсынымдарды іске асыру мәселелері қаралды.
Департаменттің Превенция басқармасы басшысының орынбасары Е.Бақтыхожаев кеңес мүшелеріне 2023 жылы білім саласы қызметкерлеріне еңбекақы төлеу қорына байланысты сыбайлас жемқорлық тәуекелдеріне жүргізілген сыртқы талдау нәтижесінде жүйелі жемқорлық тәуекелдері анықталғанын баяндады.
Талдаумен қамтылған Жамбыл, Жуалы, Байзақ, Шу аудандарында 132 бұзушылық анықталып, мемлекетке келтірілген залалдың алдын ала сомасы 207,0 млн. теңгені құраған.
Жалпы талдау бюджетті жоспарлау және оның мониторингі процессінің автоматтандырылмауы, қаржыландыру көлемін негізсіз асыра бағалау, қызметкерлер туралы жалған деректерді қолмен енгізу, үшінші тұлғаларға ақша қаражатын есептеу орын алғанын көрсетеді.
Ербол Жұмақадірұлы талдау нәтижелері бойынша Агенттік пен Оқу-ағарту министрлігі арасында білім беру саласындағы бюджет қаражатын жоспарлау және игеру процесстерінде жемқорлық тәуекелдерін жоюға бағытталған тетіктерді әзірлеу бойынша Ұйымдастыру іс-шараларына қол қойылғанын атап өтті.
2023 жылдың 4-тоқсанында Агенттіктің бастамасымен Ақмола, Павлодар және Түркістан облыстарында қолданыстағы бухгалтерлік есеп жүйесі негізінде жемқорлық тәуекелдерін жоятын цифрлық шешімдерді енгізу бойынша пилоттық жоба жүзеге асырылуда.
Пилоттық жоба шеңберінде бюджеттік өтінімдерді қалыптастыру процессін толық автоматтандыру, контингентті есепке алу, сабақтың өткізілуін бақылау, аванстарды негізсіз төлеуге тосқауыл қою тетіктері сынақтан өткізілген.
Бет биометриясын пайдалану арқылы ұйым басшысының төлем құжаттарына қол қоюы, оларды шифрлау, яғни жалған деректерді енгізуге мүмкіндік бермейтін мәселелер пысықталған.
Пилоттық жобаның нәтижелерін тарату мақсатында 2024 жылғы 16 қаңтарда Үкіметке жергілікті атқарушы органдар сатып алатын бухгалтерлік есепке алу жүйелерінің міндетті параметрлері мен техникалық сипаттамаларын біріздендіру туралы ұсыныс жіберілгенін айта келе, Превенция басшысының орынбасары Е.Бақтыхожаев кеңес мүшелеріне білім беру саласындағы жемқорлық тәуекелдері мен жымқыруды жою мақсатында енгізілетін ұсыныстар туралы баяндап берді.
Қоғамдық кеңестің төрағасы М.Абдраимов, кеңес мүшелері Ж.Омаров, Б.Құлекеев, Р. Рахманбердиев Департамент тарапынан білім саласының сыбайлас жемқорлық тәуекелдеріне жүргізілетін ішкі және сыртқы талдау нәтижелері аталған саланың жүйелік жемқорлық тәуекелдерін анықтап, нақты шешімдер қабылдауға тікелей ықпал ететінін атап өтті.
Новости KazKENES