Қосшы қалалық қоғамдық кеңесінің кезекті отырысы өтті

---

Қосшы қалалық қоғамдық кеңесінің кезекті отырысында 2 мәселе қаралды. Алғашқысы, қала тұрғындарын таза ауыз сумен қамтамасыз етудің жағдайы туралы, екіншісі мәслихаттың «Қосшы қаласының 2024-2026 жылдарға арналған бюджеті туралы» шешіміне өзгерістер енгізу туралы» шешімінің жобасын қарау туралы.

Ауыз су мәселесі бойынша қалалық ТКШ және ТИ бөлімінің бас маманы Сағындық Шорманов мәлімет берді. Тұрғындарымыз тарапынан түсіп жататын көптеген шағымдар осы мәселеге арналғандықтан кеңес мүшелері ауыз судың сапасы, судың көп қабатты үйлердің жоғарғы қабаттарына жетпеуі, әсіресе демалыс күндері жұртшылық үйде болғанда туындайтын су тапшылығы туралы сауалдарды көтерді. Бұл мәселе бойынша сұрақтарға «Қосшы су» ШҚМК бас инженері Дінмұхамед Қалиев жауап берді.

Қоғамдық кеңес мүшесі Александр Назаренко болашақта Қосшы қаласы мен аумақтық құрылымдағы елді мекендерді ауыз сумен қамтамасыз ету үлкен түйткілді мәселе болатынын, ол үшін қазірден бастап су көзін анықтау жұмыстарын жүргізу туралы тиісті органдарға дабыл қағу керектігін атап өтті.

Сондай-ақ кеңес төрағасы Сайра Матайбаева: «Қосшы қаласын ауыз сумен қамтамасыз ету мақсатында Ниже-Романовский кен орнынан басталған су беру құрылысын салу жобасы бойынша жүргізілген жұмыстың қала теңгеріміне өтпеуі себепті жұмысты әрі қарай жетілдіруге, жаңғыртуға жергілікті бюджеттен қаржы бөлу мүмкін болмай отырғандығын атап өтті. Осыған сәйкес жергілікті атқарушы орган аталған құрылысты қазіргі уақытта бар қалпында қабылдауға жұмыс жасауды ұсынды. Содан кейін жобаның тапсырыс берушісі «Целиноград аудандық тұрғын үй коммуналдық шаруашылығы және тұрғын үй инспекциясы бөлімі» мердігерден атқарылмаған жұмысты талап етуге заң талаптарына сәйкес жұмыс жасауға міндетті.

Сондай-ақ, отырыс барысында бұл жұмыстарды тез арада қолға алу қажеттігі айтылды. Халық санының жылдам артуы, тұрғын үйлер мен кәсіпкерлік және әлеуметтік нысандардың бой көтеруі сумен қамтамасыз етуді қажет ететіндіктен ауыз су мәселесі жыл өткен сайын күрделене берері анық.

Су – тіршілік көзі. Қазақстан бойынша халықтың шоғырлану тығыздығы жылдам артып келе жатқан Қосшы қаласының ауыз су мәселесі бойынша қалалық Қоғамдық кеңес, қала белсенділері облыстық деңгейдегі жауапты басқармаларға ұсыныстар жолдауды ұйғарды.

Күн тәртібіндегі екінші мәселе – қала мәслихаты шешімінің жобасын қарау туралы Экономика және қаржы бөлімінің басшысы Рүстем Мусин хабарлама жасады. Отырыс соңында Қоғамдық кеңестің Хаттамалық шешімі қабылданды.