Тараз қалалық Қоғамдық кеңестің кеңейтілген отырысында қалалық Полиция басқармасы басшылығының атқарылған жұмыстар туралы ақпараты тыңдалды

---

Жиынға құқық қорғау, атқарушы, өкілді органдар, бұқаралық ақпарат құралдарының өкілдері, колледждер басшылары, сондай-ақ, қоғам белсенділері мен қала тұрғындары қатысты.

Алғашқы сөз, Тараз қалалық Полиция басқармасы жергілікті полиция қызметі басшысының орынбасары А.Тоқбергеновке беріліп, ақпараты тыңдалып, артынан аталмыш мекеменің қызметін зерделеу қорытындылары бойынша Қоғамдық кеңестің хатшысы С.Қондыбаевтың баяндамасы жиын қатысушылары назарына ұсынылды.

Екі тараптың ақпаратымен танысқан Қоғамдық кеңес мүшелері сұрақ-жауап рәсіміне көшіп, онда жалпы қылмыс санының азаюын тілге тиек ете келе, дегенмен, бірқатар қылмыс түрлері, оның ішінде ауыр, аса ауыр қылмыс түрлері бойынша ашылу деңгейінің төмендігін, жасөспірімдер арасындағы қылмыстық ахуалдың түзелмей, керісінше тереңдей түскендігін, полицейлік тірек пункттерінің (опорный пункт) бірқатарының өзге мекемелердің балансында болуына байланысты талапқа сай еместігі, атап айтқанда қараусыз қалған жәйдей күрделі жөндеуді қажет етуі, жиһаздарының көнелігі, кейбірінің жылу жүйесіне мүлдем қосылмағандығы, мемлекеттің саяси бастамаларының өзгерісіне, мерзіміне мән берілмей, ҚР тұңғыш Президенті Н.Ә.Назарбаевтың 2017 жылғы Жолдауының ілініп тұруы («Ауыл-Береке» базары маңындағы тірек пунктінде), жеке азаматтардың өз бастамаларымен жөн-жосықсыз жол кедергілерін («лежачий полицейский») орнатуына бақылаудың жоқтығы, азаматтардың құқығын қорғау басты міндеті деп белгіленген кейбір шенділердің сыбайлас жемқорлық фактілері және өзге де құқық бұзушылықтар бойынша құрықталуы, сотталуын сын тезіне алды.

Отырыс соңында, қала тұрғындары да көкейлерінде жүрген сұрақтарын қойып, оларға тиісті жауаптар берілді.

Отырысты қорытындылаған, кеңес төрағасы С.Сейдәзімов елімізде заңдылықтың сақталуында қоғаммен тікелей жұмыс атқаратын құқық қорғау органдарының қызметінің маңыздылығына тоқталды. Соңғы 3 жылдағы облыс орталығында қалыптасқан криминогендік жылнамамен ақпараттандырған қалалық жергілікті полиция қызметі басшысының орынбасары А.Тоқбергеновке рахметін айта келе, жиналыста айтылған сын-ескертпелер мен ұсыныстар ұсыным түрінде қалалық Полиция басқармасына назарға алу үшін жолданатындығын, олардың орындалуы Тараз қалалық Қоғамдық кеңестің бақылауында болатындығын жеткізді.