Новости Казкенес
Новости KazKENESТараз қалалық Қоғамдық кеңес пен комиссияларының бірлескен отырысында үшбірдей мәселе қаралды
Тараз қалалық Қоғамдық кеңес пен комиссияларының бірлескен отырысында үшбірдей мәселе қаралды
КҮН ТӘРТІБІНДЕГІ АЛҒАШҚЫ МӘСЕЛЕ – ОБЛЫС ОРТАЛЫҒЫНДАҒЫ СТУДЕНТТЕРДІҢ ЖАТАҚХАНАМЕН ҚАМТАМАСЫЗ ЕТІЛУ ЖАҒДАЙЫНА АРНАЛДЫ.
Бұл бойынша алдағы жарияланымдарымызда жарықтандырғандай, арнайы мониторингтік топ құрылып, олар М.Х.Дулати атындағы Тараз өңірлік университеті, Ш.Мұртаза атындағы Халықаралық Тараз инновациялық институты, Жамбыл политехникалық жоғары колледжі, Абай атындағы Жамбыл гуманитарлық жоғары колледжі, Жамбыл медициналық жоғары колледжі жатақханаларының және онда қоныстанған студенттерге жасалған жәй-күймен егжей-тегжейлі танысқан болатын.
Оның қорытындысымен кеңестің Экология, мәдени-әлеуметтік, қоғамдық даму жөніндегі комиссиясының төрағасы, зерделеу тобының жетекшісі Марат Сейітбекұлы Жұманқұлов таныстырды.
Сараптама нәтижесі көрсеткендей, Ш.Мұртаза атындағы Халықаралық Тараз инновациялық институты, Жамбыл медициналық жоғары колледжі (бұл колледждікі мемлекеттік-жекеменшік серіктестік негіздегі жатақхана) жатақханаларының ахуалына оң баға беріліп, ал М.Х.Дулати атындағы Тараз өңірлік университеті, Жамбыл политехникалық жоғары колледжінің жатақханаларындағы кейбір мәселелер сын тезіне алынды. Атап айтқанда, М.Х.Дулати атындағы Тараз өңірлік университеті жатақханаларында әлі күнге студенттердің сабаққа дайындалуына әжептеуір әсері бар ғаламторлық WI-FI желісі қуаттылығының төмендігі, оған қосылудың ұзақ уақытты алуы, жиһаздарының көнелігі, білімгерлер тіршілігін жүйелейтін ережелер мен ақпараттық тақталардың болмауы, асхана мен компьютерлік залдың қызмет атқармауы назарға ілінсе, Жамбыл политехникалық жоғары колледжінің Жұбанышев көшесі, 1 мекенжайындағы жатақханасында тірек-қимыл мүшелерінде ахауы бар 1 мүгедек бала тұратындығына қарамастан, пандустың мүлдем орнатылмағаны, ғимаратқа кіреберістегі бетон баспалдақтардың аяқ басарлары сыртқа қарай еңкіштеу орнатылғандықтан, әрі текпешектердің үстінен жабылған шатырдың өзі оны қар, судан толық қорғайтындай көлемде қамтымауынан қыста тайып құлау мүмкіндігінің артуына алып келетіндігі, арнайы медициналық бөлме жасақталғанымен, штаттық медициналық қызметкердің бекітілмегені, білімгерлерге арналған асхананың атымен жоқтығы, оқу залымен, компьютерлік кластармен қамтамасыз етілгенімен, олардың сымдық ғаламтор желісі арқылы жұмыс атқаруы, оның өзі 3 айдан бері қызмет атқармай тұрғаны анықталды.
Сондай-ақ, жатақхананың әр қабатында 2 дәретхана, жуынатын, душ қабылдайтын бөлмелер болғанымен, есіктеріне білімгерлердің жыныс ерекшелігіне арналған белгілердің ілінбеуі, жатақхана ғимараты 1981 жылы пайдалануға берілген сәтінде әрбір секцияда дәретхана, жуыну бөлмелері болып, олардың ішкі қызметтік құралдары 90-шы жылдары бұзылып кеткелі бері ешбір қалпына келтірілмей, пайдаға аспай, есіктерінің жабылған күйде тұруы, оқу ордасына қарасты 2 жатақханада да WI-FI желісінің мүлдем болмай шыққандығы аталмыш колледждің жиынға қатысқан басшылығына ескертіліп айтылды.
Ал, Абай атындағы Жамбыл гуманитарлық жоғары колледжде 1997 жылдан ешбір жатақхананың болмағандығы анықталып, «сонда сырттан келіп білім алып жүрген балалар қайда қоныстанады, олардың тыныс-тіршілігін кім, қалай бақылайды?» деген сұрақтарды кеңес мүшелері колледж басшылығына төтеннен қойды.
Қосымша айта кету керек, жатақханалардың барлығына тән бір мәселе – дәрі-дәрмектердің температуралық режимін сақтауға қажетті құралдардың толық болмауы болды.
ЕКІНШІ МӘСЕЛЕ ҚАЛАЛЫҚ №7 ЕМХАНАНЫҢ СЕНІМГЕРЛІК БАСҚАРУҒА БЕРІЛУ КЕЗІНДЕГІ ЗАРДАПТАРДЫ ҚАЙТА БАСТАН КЕШІРМЕУ ТУРАЛЫ ОБЛЫС ОРТАЛЫҒЫНЫҢ №4 ОКРУГІ ТҰРҒЫНДАРЫНЫҢ ӨТІНІШІНЕ АРНАЛДЫ
Бұл бойынша отырысқа Жамбыл облысы әкімдігі денсаулық сақтау басқармасы басшысының орынбасары Үмбетәлі Перизат Жолдығұлқызы, Жамбыл облысы әкімдігі қаржы басқармасы басшысының орынбасары міндетін атқарушы Әбдіқапаров Әнуарбек Затыбекұлы, Қазақстан Республикасы Бәсекелестікті қорғау және дамыту агенттігінің Жамбыл облысы бойынша департаменті бәсекелестікті дамыту бөлімінің басшысы Оспанова Ләззат Азаматқызы, аталмыш бөлімнің бас маманы Ережепов Нұржан Рысбекұлы және №7 емхананың бас дәрігері Шатаева Әлия Өзбекқызы қатысты.
Емхананың сенімгерлік басқаруға берілген кезі мен кейін жергілікті тұрғындардың өтініші негізінде қалалық Қоғамдық кеңестің мұрындық болуымен, мемлекетке кері қайтарылғаннан соң атқарылған жұмыстар туралы бас дәрігер Ә.Шатаева таныстырып өтті.
Одан кейін сөз алған, Қоғамдық кеңес төрағасы Сембек Әбетайұлы Сейдәзімов сенімгерлік басқаруға берілген сәттегі емхананың аянышты халі мен қазіргі уақытта атқарылып жатқан ауқымды жұмыстардың арасы жер мен көктей екендігін тілге тиек етіп, емхананың қызмет көрсету аумағының Тараз қаласының жаңа Бас жоспарына сәйкес ұлғайғанын ескере отырып, оны қайтадан сенімгерлік басқаруға беруді ҚР заңнамасы аясындағы тіршілік болғанымен, халықтың өтінішіне құлақ аспаудың да белгісі деп бағалауға болады деп атап өтті.
Бұл ойға отырысқа қатысқан барлық мемлекеттік мекемелер басшыларының да ойлары тоқайлас болды, әрі қалыптасқан ахуалды, емхананың жұмысын күшейтуге тағы да әжептеуір қаражат жұмсалғалы отырғанын ескере, алдағы уақытта оны қайтадан бәсекелес ортаға шығару жоспарда жоқтығын бірауыздан мәлімдеді. Бірақ, мекеме ұжымы да өз жұмысының бәсекеге қабылеттілігін үнемі арттырып отыруды басты назарда ұстауы қажеттігін де ескертіп өтті.
ҮШІНШІ МӘСЕЛЕ ТАРАЗ ҚАЛАЛЫҚ ӘКІМДІГІ СӘУЛЕТ ЖӘНЕ ҚАЛА ҚҰРЫЛЫСЫ БӨЛІМІНІҢ МЕМЛЕКЕТТІК ҚЫЗМЕТТЕРДІ КӨРСЕТУ САПАСЫНА АРНАЛДЫ
Бұл мәселеде, Қоғамдық кеңес мүшелері бөлім басшысының міндетін атқарушы Д.Раманқұлованың есебімен таныса келе, бөлім тарапынан халықтың өтініштерін заңға томпақтығына немесе тіркеме құжаттардың толық болмауына байланысты кері қайтаруда нақты қандай заң, оның қандай тармақтарына сәйкес қайтарылғанын, сондай-ақ қандай құжат жетіспей тұрғанын атын атап тұрып көрсету қажеттігіне жете мән берді.
Отырыс соңында Тараз қалалық Қоғамдық кеңестің төрағасы Сембек Әбетайұлы Сейдәзімов қаралған мәселелердің барлығы өте маңызды екендігіне тоқтала келе, айтылған сын-ескертпелерді жою, алдын алу жауапты мекемелердің тікелей міндеті деді.
Фото
