https://www.facebook.com/permalink.php?story_fbid=pfbid02SUeeJVuL4r7A9JZzxcHET2sQ2KN3zFCUfUr1h5Wor1cFa12M5FhkUkY37mncv11Pl&id=100069253429541&__cft__[0]=AZV2rI_elaTvQ6ip7pUO5GmvAt0dW1M7M893UGJbZ4iywtCYD1sn6_XWz-rgpkaV0u9xJVMVhV5yAr1w7yNpyvi__8RfQvTgd

МЫҚТЫ МЕМЛЕКЕТ МЫҚТЫ АЗАМАТТЫҚ ҚОҒАМНАН БАСТАЛАДЫ

Қоғамдық кеңестер институты мемлекет пен қоғамның өзара іс-қимылының пәрменді құралдарының бірі ретінде «Халық үніне құлақ асатын мемлекетті» қалыптастырудың маңызды буыны болып табылады. Казталов аудандық Қоғамдық кеңесінің құрамында 11 мүше бар, оның 2-і әйел азаматша болса, 9-ы ер азаматтар, соның ішінде 5-і кәсіпкерлікпен айналысса, 3-і бюджеттік сала мамандары, 4-і зейнеткер, 2-і қоғамдық бірлестік өкілдері болып табылады, яғни азаматтық қоғам өкілдерінің үлесі 72,7 пайызды, мемлекеттік орган өкілдері 27,3 пайызды құрайды. 2023 жылдың өткен мерзімінде аудандық Қоғамдық кеңестің 10 отырысы, 2 төралқа отырыстары өткізіліп, қоғамдық маңызы бар 37 мәселе қаралды, соның ішінде Қоғамдық кеңес мүшелерінің бастамасымен 9 мәселе (24,3 пайыз) талқыланды. Қоғамдық кеңесте қаралған мәселелерді талқылау барысында айтылған ұсыныс-пікірлер негізінде қабылданған шешімдер мен ұсынымдар жұмыста ескеру үшін тиісті уәкілетті органдарға уақытылы жолданылып отырылады. Атап айтқанда, жергілікті өкілді және атқарушы органдардың нормативтік құқықтық актілері, аудандық және ауылдық округтер бюджеттерінің жобасы мен атқарылуы, ауданның даму жоспары мен инфрақұрылымдық жобалар бойынша ұсынымдар, конкурсқа шығарылатын ауылшаруашылық мақсатындағы жер учаскелерінің тізбесін, жайылымдарды басқару және оларды пайдалану жөніндегі жобаларды бекіту, оқушылардың жазғы демалысын ұйымдастыру, ауданда жүргізіліп жатқан әлеуметтік нысандар құрылысы мен күрделі жөндеу жұмыстарының барысы, республикалық және жергілікті маңызы бар автомобиль жолдарын күтіп-ұстау, жол белгілерін орнату, жолаушылар тасымалын тиісті талап деңгейінде ұйымдастыру, ауруханаларда емделушілердің дәрі-дәрмекпен қамтылуы, жас мамандарға тұрғын үй сатып алулары үшін бюджеттік несие және біржолғы көтерме жәрдемақы беру, мүгедектер қатарындағы кемтар балаларды жеке оңалту жоспары бойынша үйде оқытуға жұмсаған шығындарын өндіріп алу және аз қамтамасыз етілген отбасыларға (азаматтарға) тұрғын үй көмегін көрсетудің, сондай-ақ мұқтаж азаматтардың жекелеген санаттарына әлеуметтік көмек көрсету мөлшері мен тәртібін айқындау қағидалары, аудандық халыққа қызмет көрсету орталықтары мен жергілікті мемлекеттік атқарушы органдармен көрсетілетін мемлекеттік қызмет сапасын жақсарту жөніндегі мәселелер бойынша ұсынымдар берілді. Қоғамдық кеңес қарауына түскен мәселелердің барлығы да өзекті болғандықтан, жергілікті тұрғындардың сұраныстары мен қажеттілігінен туындап отырған қоғамдық маңызы бар мәселелер деп білеміз. Көштен қалмау, даму, өркендеу – қазіргі қоғамның басты талабы. Аудандық Қоғамдық кеңестің мүшелері азаматтық қоғам институтының өкілі ретінде ауданның саяси және әлеуметтік-экономикалық дамуын жақсарту бағытында өздерінің белсенді азаматтық ұстанымын көрсетіп, көпшілікпен жүргізілетін ақпараттық-түсінік беру шараларына да атсалысып келеді. Осы орайда қоғамдық кеңестердің қызметі жөніндегі оқырмандар ойында жүрген кейбір мәселелерге тоқталып, қысқаша сұхбат беріп өтейін: - Азаматтық қоғамның міндеті мен мақсаты қандай? - Азаматтық қоғамның міндеті – жеке адам мен мемлекет арасында делдал болу, мақсаты – қоғамның әр мүшесінің мүдделерін қорғау, оның мүдделерін билік пен қоғам алдында бейімдеу, билік қызметін қоғамдық бақылау әрі оның ішкі және сыртқы саясатын қалыптастыру болып табылады. - Қоғамдық кеңес қандай орган және оның шешімдері қандай сипатқа ие? - Қоғамдық кеңес өзінің құқықтық мәртебесі бойынша консультативтік-кеңесші орган болып табылады, олардың өз өкілеттіліктері шеңберінде қабылдаған шешімдері заңдық салдары болмайтын ұсынымдық сипатқа ие. Сонымен қатар қоғамдық кеңестердің ұсынымдары шешімдер қабылдайтын және уәжді жауаптар беретін мемлекеттік органдардың, квазимемлекеттік сектор субъектілерінің қарауы үшін міндетті болып табылады. Қоғамдық кеңестер қызметі мәселелерімен қандай орган айналысады? - Мемлекет пен азаматтық қоғамның өзара іс-қимылы саласындағы салааралық үйлестіруді жүзеге асыратын орталық атқарушы орган қоғамдық кеңестер қызметінің мәселелері жөніндегі уәкілетті орган болып табылады. - Қоғамдық кеңес туралы үлгілік ереже туралы не айтасыз? - Қоғамдық кеңес туралы үлгілік ереже қабылданғаннан кейін, әрбір Қоғамдық кеңес оның негізінде Қоғамдық кеңес туралы өзінің ішкі ережесін бекітеді. - Қоғамдық бақылауды ұйымдастыру мен жүргізу қағидалары қандай? - Қоғамдық кеңестер 4 қоғамдық бақылау нысандарын жүзеге асырады: 1) қоғамдық сараптама, 2) қоғамдық мониторинг, 3) қоғамдық тыңдаулар, 4) есептерді тыңдау. Қоғамдық кеңестер құрамын қалыптастыру жөнінде кеңірек айтып өтсеңіз? - Министрліктер, Қазақстан Республикасының Президентіне тікелей бағынатын және есеп беретін органдар, жергілікті өзін-өзі басқару органдары құрған қоғамдық кеңестер өз қызметін қазіргі құрамның өкілеттік мерзімі аяқталғанға дейін жалғастыра береді. Қоғамдық кеңестердің жаңа құрамын жасақтау қазіргі құрамның өкілеттік мерзімі аяқталғаннан кейін Қазақстан Республикасының «Қоғамдық кеңестер туралы» Заңында белгіленген тәртіппен құрылады. Қоғамдық кеңестер құру жөніндегі жұмыс топарының жетекшілері азаматтық қоғам өкілдері арасынан сайланады. Жұмыс тобы Қоғамдық кеңес құрамына енбеген кандидаттар қатарынан резертік тізімді қалыптастырады. Біздің ауданымызда да өткен жылы жұмыс тобымен қалыптастырылған резервтік тізім бар. Қоғамдық кеңестің мүшесі жазбаша түрде өтініш беру арқылы өз қалауы бойынша оның құрамынан шыға алады. Қоғамдық кеңес, егер Қоғамдық кеңес мүшесі қандай-да бір себептермен оның құрамынан шығып кеткен жағдайда, резервтік тізімнен жаңа мүше қабылдайды. Резервте тұрған кандидаттар Қоғамдық кеңес мүшесі болудан бас тартқан жағдайда, қоғамдық кеңестер қосымша конкурс өткізеді. Заңға сәйкес Қоғамдық кеңестің төралқа құрамына қоғамдық кеңестерді құрушы мемлекеттік органның уәкілетті өкілі енуі, яғни жергілікті деңгейде тиісті әкімшілік-аумақтық бірлік мәслихатының өкілі Қоғамдық кеңестің төралқа мүшесі болуы тиіс. - Қоғамдық кеңестердің өкілеттілік ету мерзімі неше жыл? - Заңда қоғамдық кеңестердің өкілеттілік ету мерзімі 3 жыл болып белгіленген. - Соңғы уақытта қоғамдық кеңестердің өкілеттіліктері кеңейтілді, қосымша берілген өкілеттіліктерді атап өтсеңіз? - Өткен жылы қоғамдық кеңестердің құзырына жататын мәселелер кеңейтіліп, қосымша өкілеттіліктер берілді, мысалы: - квазимемлекеттік сектор субъектілерін қоспағанда, мемлекеттік кәсіпорындардың, мемлекет бақылайтын акционерлік қоғамдар мен жауапкершілігі шектеулі серіктестердің даму жоспарларының іске асырылу мониторингінің нәтижелері туралы есептерді талқылау; - мемлекеттік құпияларды не Қазақстан Республикасының Заңдарымен қорғалатын өзге де құпияны құрайтын мәліметтерді қоспағанда, жергілікті деңгейде заңдылықты қамтамасыз ету және азаматтардың құқықтарын және бостандықтарын сақтау мәселелері бойынша тиісті әкімшілік-аумақтық бірлік шегінде құқық қорғау органдары басшыларының ақпаратын тыңдау. - Нормативтік құқықтық актілер жобаларын және азаматтардың өтініштерін қарау қалай жүргізіледі? - Қоғамдық кеңес мүшелері Заңға сәйкес азаматтардың құқықтары, бостандықтары мен міндеттеріне қатысты қаралатын нормативтік құқықтық актілер жобаларын анықтау бойынша Қоғамдық кеңесте қарау немесе қараусыз қалдыру туралы ұсыныстар енгізе алады. Азаматтардың өтініштері негізінде Қоғамдық кеңес қоғамдық бақылау нысандарының бірін бастау туралы шешім қабылдауға құқылы. Тиісті рәсімдер Қоғамдық кеңес туралы ережеде нақтыланады. - Қоғамдық кеңестердің қызметін ұйымдастырушылық қамтамасыз ету қалай жүзеге асырылады? - Қоғамдық кеңес мүшелері өз міндеттерін қоғамдық негізде атқарады, ал қаржыландыру аудандық мәслихат аппаратының ағымдағы шығыстары шеңберінде келесі қызмет бағыттары бойынша жүзеге асырылады: 1) Қоғамдық кеңес хатшысының еңбегіне ақы төлеу; 2) қоғамдық бақылау нысандарын жүргізгені үшін сырттан тартылатын сарапшылардың қызметіне ақы төлеу және қажет болған жағдайда, қоғамдық кеңес мүшелерінің куәліктерін әзірлеуге кететін шығыстар; 3) кеңсе шығындары; 4) жергілікті деңгейде қажет болған жағдайда, көшпелі отырыстар өткізу үшін іссапар шығындары. - Қоғамдық кеңес қызметі туралы мазмұнды сұхбатыңыз үшін рақмет! - Азаматтық қоғамның қоғамдық маңызы бар мәселелері бойынша сұхбатқа шақырып, қызығушылық танытқаныңыз үшін Сізге де ризашылығымды білдіремін. Қоғамдық кеңес әрдайым халықпен ашық диалог орнатып, ауыл-аймақтың проблемалық мәселелерін шешу және өз қызметінің дербестігі мен жариялылығын қамтамасыз ету бағытында жұмыстана беретін болады.

Казталов аудандық Қоғамдық кеңесінің төрағасы М.С.Есмағұлов Сұхбатты жүргізген Әсем Болат, «Ауыл айнасы», №41, 10.10.2023ж.

Фото

Previous Next