ӘЛЕУМЕТТІК ТҰРҒЫДАН ОСАЛ АЗАМАТТАРҒА ҚОЛДАУ КӨРСЕТУ - ӨТЕ МАҢЫЗДЫ МІНДЕТ.

 “Қоғамдық кеңестер туралы” ҚР Заңының 5-бабы 1-тармағы 6) тармақшасына сәйкес Қоғамдық кеңес мемлекеттік органның немесе өңірдің тиісті қызмет саласының қоғамдық маңызды мәселелері бойынша жеке және заңды тұлғалардың жолданымдарын қарайды.

 Жамбыл облыстық Қоғамдық кеңесінде Гродиково ауылдық округі тұрғынының әлеуметтік жағдайы төмен отбасында тәрбиеленетін (ата-анасы 2,3 топтағы мүгелектер) М.Х.Дулати атындағы Тараз өңірлік университетінде үздік оқитын студент қызының оқу төлемақысына жеңілдіктер жасауды сұраған жолданымы қарастырылған болатын.

 ҚК мүшесі, Ұлттық Құрылтай мүшесі Айгерім Дәулетбаева және ҚК мүшесі, қалалық ата-аналар комитетінің төрағасы Ринат Нұрақбаев 4 қыркүйек күні аталған жолданым бойынша университет ректоры Мұхтар Байжұмановтың қабылдауында болды.

 ҚК мүшелерін мұқият тыңдаған оқу орнының басшысы Мұхтар Қазбекұлы әлеуметтік көмекке мұқтаж студенттерге қолдау көрсетуге қатысты университет жарғысына өзгерістер енгізіліп, ақылы негізде жақсы оқитын білім алушылардың, оның ішінде Қоғамдық кеңеске өтініш жолдаған ата-ананың сұрағы қанағаттандырылып, оқу төлемақысына жеңілдіктер жасау қарастырылатынын жеткізді.

 Мемлекет басшысы “Әділетті Қазақстан: заң мен тәртіп, экономикалық өсім, қоғамдық оптимизм” атты халыққа Жолдауында атап көрсеткендей, әлеуметтік тұрғыдан осал азаматтарға қолдау көрсету - өте маңызды міндет. Кез келген әлеуметтік қолдау әділ, ашық және тиімді болуға тиіс.

Жас ұрпақтың өз елінің кірпіші болып қаланып, арман-мұратына жетуіне пайдасы тиетін, отаншылдық идеясына адал азаматтарға мың алғыс!

Фото

Previous Next