ҚОҒАМДЫҚ БАҚЫЛАУ ӨТТІ

«Таза Қазақстан» республикалық акциясы аясында Мақтаарал аудандық Қоғамдық кеңесімен қоғамдық бақылау жүргізілді.

Қазақстан Республикасының Президенті Қ.К.Тоқаевтың тапсырмасымен ел аумағында ағымдағы жылғы 8 сәуірден бастап, «Таза Қазақстан» экологиялық акциясы қарқынды өтуде.

Бүгін, 2024 жылдың 27 шілдесі күні Мақтаарал аудандық Қоғамдық кеңесінің мүшелерінің қатысуымен «Таза Қазақстан» жалпы ұлттық экологиялық акциясы шеңберінде Мақтаарал ауданында өткізіліп жатқан сенбіліктерге қоғамдық бақылау жүргізілді.

Мақтаарал ауданында өткізілген сенбілікке кенттер мен ауылдық округтердің әкімдіктері, қоғам белсенділері, аудан жастары, жалпы аудан тұрғындары өз үлестерін қосып, тазалық жұмыстарына белсене қатысты. Сенбілікке жалпы 500-ден астам адам қатысты.

Мақтаарал аудандық қоғамдық кеңесінің мүшелері «Таза Қазақстан» экологиялық акциясына белсенді қатысып, күш жігерін осынау игі іске арнаған азаматтармен жеке-жеке кездесіп, ой-пікір алмасты.

Мақтаарал ауданының Қоғамдық кеңесінің төрағасы М.Ердешов ең алдымен сенбілікке қатысушыларға іс-шараның мақсаты – аудан тұрғындары арасында қоғамдық мәдениет деңгейін арттыру арқылы республикалық деңгейдегі акцияға қолдау көрсету болып табылатынын айтып өтті.

Аудан бойынша сенбілік іс-шаралары аудан орталығы Мырзакент кенті мен Ақжол және Азаттық елді мекендерінің аймақтарында өтті. Қоғамдық бақылау барысында Қоғамдық кеңес мүшелері «Таза Қазақстан» акциясына қатысушыларға жергілікті атқарушы органдардың тарапынан барлық жағдайлар жасалып жатқанына көз жеткізді. Атап айтқанда кент және ауылдық округтері әкімдіктері тарапынан жиналған қоқыстарды шығаруға арнайы техникалар тартылған. Сонымен қатар, акцияға қатысушыларды тасымалдау үшін арнайы көліктер дайындалған.

Сенбілікте көлікжолдар мен аяқжолдардың бойлары жабайы шөптерден тазартылып, аялдамаларға әктеу-сырлау жұмыстары жүргізіліп, билбордтар және жарықшам бағаналарына бояулар жағылды. Жасыл желектерді ақтау жұмыстары да қоса жүргізілді.

Қоғамдық бақылау барысында, Қоғамдық кеңес мүшелері аудан орталығының сауда орталықтары мен дәмханаларын аралап шықты. Сауда орталықтары мен дәмханалардан қоқыстың көп шығуына байланысты Қоғамдық кеңестің төрағасы М.Ердешов қоқысқа арналған жәшіктерді көбейтуді ұсынды және осы мәселені жергілікті атқарушы органдарға жеткізетінін айтты.

Қоғамдық кеңес мүшелері ұйымдастырылған сенбілік жұмысына атсалысқан жастар қауымына өз кеңестерін айтып, сәттілік тілеп, қазақтың ертеден келе жатқан ұлттық дәстүрлерінің бірі қол жайып баталарын берді.

«Таза Қазақстан» жалпы ұлттық экологиялық акциясы аясында ұйымдастырылатын мұндай сенбіліктер халықтың ыстық ықыласын, белсенділігін туғызатын, қоғам арасында экологиялық мәдениетті қалыптастыратын дәстүрге айналуы тиіс.

Мақтаарал аудандық Қоғамдық кеңесінің төрағасы М.Ердешов «Таза Қазақстан» жалпы ұлттық экологиялық акциясы шеңберінде мұндай жұмыстар ұдайы жүргізілетінін, өңірде мұндай іс-шаралар қоғамдық бақылауға алынатынын айтты. Қоғамдық бақылау, нәтижесі бойынша қорытындыланып, БАҚ-та және Қоғамдық кеңестің фейсбук әлеуметтік желісінде жарияланып тұрады.

Қоғамдық бақылау барысында Мақтаарал ауданында жалғасын тауып жатқан «Таза Қазақстан» жалпы ұлттық экологиялық акциясы аясында ұйымдастырылған сенбілікке бақылау жасалды. Қоғамдық бақылау нәтижесінде өткізілген сенбілік жұмыстарына талдау жүргізіліп, тиісті ұсыныстар берілді.

(с) Мақтаарал ауданының Қоғамдық кеңесі

Фото

Previous Next