МАҚТААРАЛ АУДАНЫНДА «ТАЗА ҚАЗАҚСТАН» ЭКОЛОГИЯЛЫҚ АКЦИЯСЫ ЖАЛҒАСЫП ЖАТЫР.

Қазақстан Республикасының Президенті Қ.К.Тоқаевтың тапсырмасымен ел аумағында ағымдағы жылғы 8 сәуірден бастап, «Таза Қазақстан» экологиялық акциясы өтуде.

Мақтаарал ауданында «Таза Қазақстан» экологиялық акциясы аясында бірқатар іс-шаралар ұйымдастырылды. Экологиялық мәдениетті қалыптастыру, қоршаған ортаның тазалығын сақтау жұмыстары жүйелі түрде жоспарға сай жүргізілуде.

Мемлекет басшысының тапсырмасына сәйкес, «Таза Қазақстан» экологиялық акциясы апталық іс-шараларға бөлініп, әр аптаның өзіндік тақырыбына сай нақты мақсаттарға бағытталды. Жалпы «Таза Қазақстан» апталығы бұл бірнеше тақырыптық шараларды қамтиды.

Бірінші апта «Таза өлке» деп аталып, тұрғындар қоғам белсенділері мен мекемелер өз аула-жайларын тазалады. «Киелі мекен» апталығы қала аумағындағы тарихи-мәдени ескерткіштерді абаттандыруға бағытталса, «Жасыл аймақ» апталығында ағаш егу жұмыстары жүргізіледі. Ал жас буын «Өнегелі ұрпақ» апталығы кезінде ардагерлер мен қарттар үйінің ауласын жинап, қолғабыс жасайды. Шараның соңғы аптасы «Мөлдір Бұлақ» тақырыбымен өтіп, өзен-көл жағасы тазартылады.

Мақтаарал ауданында ағымдағы жылдың сәуір айында бірқатар іс-шаралар ұйымдастырылып 4 мыңнан астам адам қатысты. Атап айтқанда ауданның дербес бөлімдері, кенттер мен ауылдық округтердің әкімдіктері, жалпы мемлекеттік қызметкерлер және дербес бөлімдерге қарасты коммуналдық мемлекеттік мекемелердің қызметкерлері, аудан бойынша шекара басқармасының сарбаздары, аудандық төтенше жағдай бөлімінің мамандары, қоғам белсенділері, аудан жастары, жалпы аудан тұрғындары өз үлестерін қосып, тазалық жұмыстарына белсене қатысты. Іс-шараның мақсаты – аудан тұрғындары арасында қоғамдық мәдениет деңгейін арттыру арқылы республикалық деңгейдегі акцияға қолдау көрсету болып табылады.

«Таза Қазақстан» акциясы бүгінгі күні халықтың ыстық ықыласын, белсенділігін туғызатын, қоғам арасында экологиялық мәдениетті қалыптастыратын дәстүрге айналмақ.

«Таза Қазақстан» – керемет бастама. Әзіргі таңда акция аясындағы апталық шаралар әр сенбілікте өз жалғасын табуда. Сенбілікте көлікжолдар мен аяқжолдардың бойлары жабайы шөптерден тазартылып, жасыл желектер мен көшеттер егілді. Аялдамаларға әктеу-сырлау жұмыстары жүргізіліп, билбордтар және жарықшам бағаналарына бояулар жағылды. Жаңадан көшеттер егіліп, дарақтарды ақтау жұмыстары да қоса жүргізілді.

Осы ретте аудан тұрғындарын өз ауылын, ауласы мен бақшаларын таза ұстап, жасыл желектер отырғызуға шақырамын. «Тазалық – табалдырықтан басталады», сондықтан қоршаған ортаның тазалығына жауапкершілікпен қарау әр азаматтың басты міндеті.

Мақтаарал аудандық

Қоғамдық кеңесінің төрағасы М.Ердешов

Фото

Previous Next