Тараз қалалық Қоғамдық кеңестің жаңа құрамы іске кірісті

Тараз қалалық Қоғамдық кеңестің IV шақырылым мүшелері сайланып,  ұйымдастыру мәселелері бойынша алғашқы отырысы өтті.

Отырысты басында ашып, жүргізген, кеңес мүшелігіне іріктеу өткізген Жұмысшы топтың жетекшісі М.Жаманбаев ҚР "Қоғамдық кеңестер туралы" Заңы мен ереже негізінде ұйымдастырылған сайлау барысы және нәтижелері туралы баяндай келе, Тараз қалалық Қоғамдық кеңестің ережесін бекіту жөнінде кеңестің жаңа құрамына ұсыныс жасады, ережемен танысқан олар бірауыздан бекітті.

Ал, жиынға арнайы қатысқан Тараз қалалық мәслихатының төрағасы К.Олжабай кеңес мүшелігіне өткен азаматтарды құттықтап, оларға куәліктері мен төсбелгілерін табыстады.

Сонымен бірге, жиында сөз алған Тараз қаласы әкімінің орынбасары Ұ.Сламбек те кеңес құрамына сайланғандарға өз құттықтауын жеткізіп, жұмыстарына сәттілік тіледі.

Жұмысшы топ жетекшісі ретінде М.Жаманбаев өкілеттілігі тәмамдалар тұста кеңес төрағасын сайлау жөніндегі мәселеге кеңес мүшелерінің назарын аударды.

Кеңес төрағалығына жаңа құрам тарапынан, тек бір ғана - Сейдәзімов Сембек Әбетайұлының кандидатурасы ұсынылып, ол бірауыздан сайланды.

Енді жұмысын бастаған кеңес құрамының алғашқы отырысының тізгінін қолға алған, Сембек Әбетайұлы оның жұмыс комиссиялары, төралқасы, кеңес жанындағы тұрақты сарапшы комитет құрамдарын, төрағаларын, сондай-ақ, алқалы құрылымның түрлі өзекті сұрақтарды қамтыған, кеңес мүшелерінің пікірлері, талқылаулары ескеріле отырып әзірленген, сантарапты жұмыс жоспарларының жобасын бекітуді ұсынды. Олар кеңеспен бірауыздан қабылданды.

Осылай, Тараз қалалық Қоғамдық кеңестің IV шақырылымы өз жұмысын бастап кетті.

Фото

Previous Next