Новости Казкенес
Новости KazKENESКелес ауданында әлеуметтік, сәулеттік және қаржылық мәселелер бойынша маңызды шешімдер қабылданды
Келес ауданындағы Қоғамдық кеңестің отырысында аудандық мәслихаттың бірқатар маңызды шешім жобалары қаралды. Жиын барысында әлеуметтік қолдау, сәулеттік келбетті жаңарту және ауыл шаруашылығын дамыту мәселелері кеңінен талқыланды.
Талқыланған шешімдердің бірі — «Тұрғын үй сертификаттарының мөлшері мен оларды алушылар санаттарының тізбесін айқындау туралы» шешім жобасы. Бұл құжат әлеуметтік осал топтарға тұрғын үйге қол жеткізу мүмкіндігін арттыруды көздейді. Шешімде тұрғын үй сертификаттарының нақты мөлшері мен оны алушылардың санаттары айқындалатын болады.
Сондай-ақ «Елді мекендеріне біріңғай сәулеттік келбет беру мақсатында көп пәтерлі тұрғын үйлердің қасбеттері мен шатырларын жөндеу жөніндегі іс-шараларды ұйымдастыру және жүргізу қағидаларын бекіту туралы» қаулы жобасы ұсынылды. Бұл бастама ауданның көркі мен сәулеттік үйлесімділігін арттыруға бағытталған.
Қоғамдық кеңесте үшінші мәселе ретінде «Келес ауданы бойынша 2025–2029 жылдарға арналған жайылымдарды басқару және оларды пайдалану жөніндегі жоспарды бекіту туралы» шешім жобасы қаралды. Жоспар ауыл шаруашылығының тұрақты дамуына негіз болмақ.
Сонымен қатар Келес аудандық мәслихаты 2024 жылғы 20 желтоқсандағы №21-153-VIII «2025–2027 жылдарға арналған аудандық бюджет туралы» және 2024 жылғы 27 желтоқсандағы №22-166-VIII «Ауыл және ауылдық округтердің бюджеттері туралы» шешімдеріне өзгерістер енгізді. Бұл түзетулер ауданның қаржылық жоспарын нақтылап, негізгі салаларды тиімді қаржыландыруға мүмкіндік береді.
Барлық шешім жобалары Қоғамдық кеңесте ашық талқыланып, кеңес мүшелерінің ұсыныстары мен ескертулері негізінде толықтырулар енгізілетін болды. Аталған бастамалар Келес ауданының әлеуметтік-экономикалық және сәулеттік дамуын қамтамасыз етуге бағытталған.
Фото
