Новости Казкенес

Төралқа отырысы өтті

 Қоғамдық кеңес мүшелерінің азаматтардың құқықтарына, бостандықтары мен міндеттеріне қатысты, Қоғамдық кеңесте қаралуға жататын нормативтік құқықтық актілерді айқындау жөнінде ұсыныстар енгізуге құқығы бар.

6 мамыр күні Қоғамдық кеңестің қызметіне басшылықты жедел жүзеге асыру үшін оның отырыстарының арасындағы кезеңде сайланатын Жамбыл облыстық Қоғамдық кеңесінің Төралқасының отырысы өткізілді.

Отырысқа Төралқа мүшелері Дүйсеналы Бықыбаев, Амангелді Карентаев, Батырбек Құлекеев, Рахметілда Рахманбердиев, Сұлушаш Құрманбекова, онлайн режимінде Марат Абдраимов, облыс әкімдігінің табиғи ресурстар және табиғат пайдалануды реттеу басқармасының басшысы Нартай Егембердиев, басқарманың бас маманы Мейірбек Сағындықов қатысты.

Күн тәртібінде “Жамбыл облысы бойынша кен іздеушілікке арналған аумақтарды айқындау туралы” Жамбыл облысы әкімдігінің 2018 жылғы 24 желтоқсандағы N266 қаулысына өзгерістер енгізу туралы” Жамбыл облысы әкімдігінің қаулы жобасын ҚК мүшелерінің талқылау барысында туындаған сұрақтар қарастырылды.

Кеңес төрағасы Дүйсеналы Дыбысалыұлы ҚР “Қоғамдық кеңестер туралы” Заңында бекітілген Қоғамдық кеңестің өкілеттіктері, Қоғамдық кеңес мүшелерінің құқықтары мен міндеттеріне тоқталып, оның ішінде азаматтардың құқықтарына, бостандықтары мен міндеттеріне қатысты Қоғамдық кеңесте қаралуға жататын нормативтік құқықтық актілерді айқындау жөнінде Қоғамдық кеңес мүшелерінің ұсыныстар енгізуге құқығы бар екендігін атап айтты.

Төралқа мүшелері Рахметілда Сегізбайұлы, Батырбек Әбдірәсілұлы, Сұлушаш Сәтбекқызы, Амангелді Карентайұлы басқарма басшысы Нартай Әлібекұлына қолданыстағы заңнама аясында НҚА жобаларын қарауға ұсыну мерзімдерін сақтауды, кеңес мүшелерінің қаулы жобасын талқылау барысында қойылған сұрақтарын назарға алып, облыс әкімдігінің мемлекеттік-құқықтық қызмет бөлімінің келісімімен әзірлеп, талқылауды ұсынды.

Отырыста Қоғамдық кеңес комиссияларының жұмысын үйлестіру, кеңес отырыстарын өткізуге дайындықты ұйымдастыру, ҚК ұсынымдарының орындалуына мониторингті жүзеге асыру жөніндегі төралқаның міндеттері жан-жақты талқыланып, тиісті шешімдер қабылданды.

Фото