Қоғамдық бақылаудың міндеті – мемлекеттік органдар қызметінің тиімділігі, ашықтығы және бүкпесіздігін арттыру

Қоғамдық бақылау – бұл қоғамның мүддесін қорғауға бағытталған қызмет. Осы орайда Жамбыл облыстық Қоғамдық кеңесінің кезекті отырысында кеңес мүшелерінің қоғамдық бақылау нысандарында жүргізілген жұмыстары қаралып, жан-жақты талқыланды.

 Сәуір-мамыр айларында жүргізілген мониторинг қорытындысы

Ағымдағы жылдың сәуір-мамыр айларында облыс әкімдігінің ауыл шаруашылығы басқармасы мен аудан әкімдіктерінің ауыл шаруашылық бөлімдеріне жүргізілген қоғамдық мониторингтің қорытындысын мониторингтік топ жетекшісі Амангелді Карентаев баяндады. Мониторинг барысында топ мүшелері аудан-ауылдарды аралап, егістік алқаптарында шаруалармен кездесіп, ауыл шаруашылығы саласындағы қазіргі ахуал мен мемлекеттік қолдау тетіктеріндегі түйткілдер жайлы мәселелерді тыңдады.

Ауыл шаруашылығындағы өзекті мәселелер

Т.Рысқұлов, Шу, Жуалы, Байзақ, Сарысу аудандарының шаруалары бизнесті дамытуға арналған субсидияларды алу кезіндегі қиындықтар, қажетті ақпараттың ашық болмауы, ағын судың тапшылығы, ауыл шаруашылық техникаларына қолжетімсіздік, жер ресурстарын пайдаланудағы келеңсіздіктер, сондай-ақ тұқым шаруашылығына зертханалық талдаулардың жүргізілмеуі сияқты күрделі мәселелерді ортаға салды.

 Мемлекеттік органдардың жауабы

Кеңес отырысына қатысқан мүдделі мемлекеттік органдар тарапынан, атап айтқанда, ауыл шаруашылығы басқармасының басшысы Қайрат Көшенов пен жер қатынастары басқармасының басшысы Данияр Үтепов мониторинг барысында айтылған сын-ескертпелерге қатысты уәжді жауаптарын берді.

 Кеңес мүшелерінің ұсыныстары

Қоғамдық кеңес төрағасы Дүйсеналы Бықыбаев, кеңес мүшелері Рахметілда Рахманбердиев, Батырбек Құлекеев, Жангелді Омаров және комитет мүшесі Аманжол Аманбаев агроөнеркәсіп кешенін дамыту, тұқым шаруашылығын субсидиялау және саладағы ашықтық пен әділеттілікті арттыру жолында басқарманың ішкі құжаттарына өзгерістер енгізу қажеттігін атап өтті.

 Мониторинг нәтижелері мен ұсынымдар

Кеңестің 24 мүшесі қоғамдық мониторингтің аудандарда сапалы жүзеге асқанын жоғары бағалап, мониторинг қорытындысы негізінде ауыл шаруашылығы басқармасы мен аудандық бөлімдерге мемлекеттік қызмет көрсету барысында азаматтар үшін анықталған жағымсыз салдарларды жоюға бағытталған ұсыныстарды толықтырулармен қабылдады.

 Энергетика және тұрғын үй-коммуналдық шаруашылық мәселелері

Кеңес отырысында энергетика және тұрғын үй-коммуналдық шаруашылық басқармасының атқарған жұмыстары туралы есебі тыңдалды. Басқарма басшысының міндетін уақытша атқарушы Дамир Тұңғатов облыстағы қала мен ауылдарды ауыз сумен, газбен, электр қуатымен қамтамасыз ету, жылу энергетикасы мен тұрғын үй-коммуналдық шаруашылық салаларын дамыту бағытында атқарылған жұмыстарды баяндады.

Ауыз су, газ және электрмен қамту көрсеткіштері

Облыстағы 371 елді мекеннің 98%-ы (1 млн 222 мың адам) ауыз сумен қамтылған. Тараз және Шу қалалары бойынша 9 тұрғын алқап (10,6 мың адам) пен 27 ауылдық елді мекенге (13,1 мың адам) ауыз су желілері тартылмақ. 371 елді мекеннің 288-і табиғи газбен қамтамасыз етілген. Облыста 24 нысан электр энергиясын өндірумен айналысады. 2025 жылы 4,8 млрд кВт/сағ. электр энергиясы өндірілмек. Сонымен қатар Тараз қаласының 15-шағын ауданын электрмен қамту үшін қосалқы станция құрылысына 1 млрд теңге бөлінген (жалпы жоба құны – 6,9 млрд теңге).

Кеңес мүшелерінің сұрақтары және басқарманың жауабы

Есептік тыңдау барысында кеңес мүшелері Рахметілда Рахманбердиев, Амангелді Карентаев, Жангелді Омаров, Елдос Далабай, сондай-ақ комитет мүшелері Рахманқұл Байтелиев пен Мырзахан Бурханов Шу, Сарысу аудандарын газдандыру, Тараз қаласының 4 тұрғын алқабын ауыз сумен қамтамасыз ету, су жүйесін теңгерімге алу, басқарманың ұзақ мерзімді жоспары мен 15-шағын ауданның жылумен қамтылмауы сынды мәселелерге қатысты сұрақтар қойды. Басшының міндетін атқарушы Дамир Тұңғатов сұрақтарға өз құзыреті аясында нақты жауаптар беріп, басқарманың есебі “қанағаттанарлық” деп танылды.

 Білім беру саласындағы қаулы жобалары

Күн тәртібінде білім басқармасының “2025-2026 оқу жылына жоғары және жоғары оқу орнынан кейінгі білім бар кадрларды даярлауға мемлекеттік білім беру тапсырысын бекіту туралы” қаулы жобасы да қаралды. Басқарма басшысының міндетін атқарушы Ләззат Қызылқұлова кеңес мүшелерінің сұрақтарына жауап беріп, НҚА жобасы мақұлданды.

 Техникалық және кәсіптік білімге қатысты құжаттар

Ал “2025-2026 оқу жылына арналған техникалық және кәсіптік, орта білімнен кейінгі білімі бар кадрларға мемлекеттік білім беру тапсырысын бекіту туралы” қаулы жобасына қатысты қажетті мәліметтердің жеткіліксіз болуына байланысты қарау мерзімі ұзартылды.

Фото

Previous Next