Кездесу

Міндетті әлеуметтік медициналық сақтандыру мәселелері.

Атырау облыстық қоғамдық кеңес төрағасы Б.Сарсенғалиев және қоғамдық кеңес мүшелері «Әлеуметтік медициналық сақтандыру қоры» КЕАҚ Атырау облысы бойынша филиалының директоры  Г.Салимғалидың шақыруымен филиал қызметі мәселелеріне арналған кеңеске қатынасты.

Іс-шара барысында Қор филиалының атқарған жұмыс қортындылары, міндетті әлеуметтік медициналық сақтандыру жүйесі аясында көрсетілетін медициналық көмекті қаржыландыру және ұйымдастыру мәселелері талқыланды.

Қоғамдық кеңес мүшелері айдың соңына таман емханалар мен ауруханаларда қаражат таусылып, тегін медициналық көмекке қол жеткізу қиындап бара жатқандығын айтты. Себебі, Филиал ауруханаларға қажетті қаражатты аз бөлетіндіктен, ауруханалар бюджеттен тегін медициналық көмек көрсетуге арнап бөлінген ақшаны игеріп тауысады. Сөйтіп, аурухана келесі айлардың есебінен ем беріп, кредиторлық қарызға кіреді. Сақтандырылмаған азаматтарға емханалар есігін мүлде ашпайды. Өмір бойы жұмыс жасап, 1-2 ай жұмыссыз қалғандар да жарна төлемегенсіз деген сылтаумен ем қабылдай алмайды. Жаңа жұмысқа қабылданғандар да алғашқы төлемдер түспейінше тіркелген емхана қабылдамайды.

Қоғамдық кеңес мүшелері жоспардан тыс қызмет көрсеткен емдеу мекемелерінің қаржылық лимитін көтеру және МӘМС  салығын төлемейтіндер қатарын азайту үшін нақты тетіктерді енгізуді ұсынды.

Халық денсаулығын сақтау - мемлекеттің негізгі  міндетінің бірі болғандықтан, бұл сала терең талдауды, әділдікті және жүйелі шешімдерді қажет етеді.

Фото

Previous Next