Тараздық Қоғамдық кеңес көшеттер мен оларға күтімнің ахуалына назар аударды. НӘТИЖЕ КӨҢІЛ КӨНШІТЕРЛІК ЕМЕС!

Тараз қалалық Қоғамдық кеңес құрамы Республикалық Экобақылау акциясы аясында облыс орталығының 15 мөлтек ауданы мен «Қызыл Абад» алабындағы «жасыл белдеуге» отырғызылған көшеттер мен оларға күтімнің ахуалымен танысып қайтты.
 

Айта кету керек, зерделеу тобын облысымыздың бас қоғамдық эколог маманы – С.Қойбақов басқарып, мақсатты шараның пәрменділігін арттыруға Қ.Есімбеков, М.Сұраншиев, Б.Үмбетқұлов, Э.Байназарова және С.Қондыбаев атсалысты.

Қоғамдық бақылау барысында, әсіресе, күннің аптап ыстығында жанашырлықты аса қажет ететін тал-дарақтардың күйі шыны керек зерделеушілердің көңілінен шықпады деуге болады.

Алғаш назар аударылған, 15 мөлтек ауданда жалпы саны – 1560 көшет отырғызылған. Оның ішінде, көпшілік көзіне бірден түсер - Көшек батыр көшесі бойындағы саябақ пен №64 мектептің маңындағы скверде ағаштардың халі зерделенгенде орын алған ортақ кемшіліктер төмендегідей түзілді:

- өскіндердің ирригациялық жүйелер арқылы ағын сумен қамтамасыз етілмеуі (Түйте каналы аумағынан өзге);

- жер бедері тегістелмей отырғызылуы;

- жүйелі түрде суғарылмауы;

- ауруға шалдыққан ағаштарды емдеу шараларының дер кезінде ұйымдастырылмауы;

- орналастырылған нүктелі (тамшылатып) суғару жүйесінің әлі күнге іске қосылмай тұруы, онымен ағаштардың толық қамтылмауы (тек Көшек батыр көшесі бойындағы скверде ғана осындай жүйе жартылай орналастырылған);

- суғаруға қажетті су ұңғымаларының жеткілікті болмауы, барының өзінің зерделенген күнге дейін іске қосылуының жоспарланып тұруы;

- көшеттер арасында эстетикалық абаттандыру шараларының жүргізілмеуі, арам шөп басып тұруы.

Сондай-ақ, мөлтек аудан ішіндегі және аталмыш ауданға алып барар негізгі күре жолдардың бірі - Қойшыбеков көшесі бойындағы лотоктарда ағын судың мүлдем ақпауы, құрылыс және тұрмыстық қоқыстарға толы болуы еріксіз назар аударды.

Ал, «Қызыл Абад» аумағындағы жалпы көлемі 80 гектарлық "жасыл белдеудің" бүгінгі күнге дейін 60 гектарына, яғни әр жылы 20 гектарға 20 мыңнан 3 жыл қатарынан көшеттер отырғызылған.

Бақылау барысында - 2023 жылы отырғызылған ағаштардың барлығы дерлік өнбей қалғаны, 2024 жылғының 80-90 пайызы жайқалып тұрғаны, 2025 жылдың көктемінде егілген 10 мың түп жасыл желектің (қалған 10 мыңын отырғызу күзге жоспарланған) 20%-ға жуығы ғана өніп тұрғаны анықталды.

Зерделеу уақытында бекітілген жұмысшылардың еңбегінің арқасында өскіндер сумен қамтамасыз етіліп тұрды.

Десе де, суару ісінде де проблема жоқ емес. "Жасыл ел -Тараз" ЖШС-і прорабының айтуынша, "жасыл белдеуге" қарастырылған осы 80 гектар жер теліміне әлі күнге жауапты мекемелер тарапынан мемлекеттік акт әзірленбеген болып шықты. Сәйкесінше, "Қазсушар" РМК Жамбыл филиалынан заңды түрде су алуда қиыншылықтардың туындап отырғаны мәлім болды.
 

Фото

Previous Next