Новости Казкенес
Новости KazKENESСЕНАТ ДЕПУТАТТАРЫМЕН МАҢЫЗДЫ КЕЗДЕСУ
ҚР Парламенті Сенатының төрағасы Мәулен Әшімбаев а.ж. 3-шілдеде Жамбыл облысына сапары аясында облыстық мәслихат депутаттары, Тараз қаласы мен аудандық мәслихаттардың төрағалары, Тараз қаласы мен аудандар бойынша қоғамдық кеңестердің төрағалары, облыстық қоғамдық кеңестің мүшелері, зиялы қауым өкілдері, облыс әкімінің орынбасарлары, қоғам белсенділері, ардагерлер кеңесінің мүшелері, облыстық Қазақстан халқы Ассамблеясының мүшелерімен кездесу өткізді.
Кездесуге ҚР Парламенті Сенатының Конституциялық заңнама, сот жүйесі және құқық қорғау органдары жөніндегі комитеттің төрағасы Нұрлан Бекназаров, ҚР Парламенті Сенатының Қаржы және бюджет комитетінің мүшесі Бекболат Орынбеков, ҚР Парламенті Сенатының Аграрлық мәселелер, табиғатты пайдалану және ауылдық аумақтарды дамыту комитетінің мүшесі Сәкен Арубаев қатысты.
Облыстық мәслихаттың төрағасы Абдалы Нұралиев ҚР Парламенті Сенатының төрағасы және сенаторлар қызметіндегі аймақтарға сапары маңызды әрі қажетті практика екендігін, осы ретте сенаторлардың кездесуге қатысушылармен ашық диалог орнатып, ұсыныстарды тыңдауға арнайы келгенін айтты.
Мәслихат төрағасы бұл жұмыстың орталық пен өңірлер арасындағы байланысты нығайтуға, өзекті мәселелерді жергілікті жерлерде анықтауға, жергілікті мемлекеттік органдармен тиімді өзара іс-қимылды қамтамасыз етуге және заң шығару деңгейінде теңгерімді шешімдер қабылдауға мүмкіндік беретінін атап өтті.
Облыстық мәслихат депутаттарының сессияда қаралатын мәселелер бойынша облыс аумағында атқарылған жұмыстарды зерделеп, кемшіліктерді анықтап, сараптама жұмыстарын белсенді жүргізуі депутаттардың өз сайлаушыларымен кері байланыс орнатуға жол ашқан қадам болғаны, депутаттар тарапынан жергілікті атқарушы органдардың басшыларына 92 депутаттық сауал жіберілгені айтылды.
Мәслихат төрағасы Абдалы Тоқбергенұлы Сенат пен мәслихаттар арасындағы өзара байланыстың жылдан жылға нығаюы, өңірлік проблемаларды шешуге арналған заңдардың қабылдануы, өңірлердің мүддесін қорғайтын палата ретінде Сенат мәслихаттармен өзара байланысты ары қарай арттыру мақсатында өңірлік депутаттық тобы құрамының жаңартылып, жергілікті өкілетті органдармен іс-қимыл жасау комитетінің қызметі қайта құрылғаны, бюджет, салық, су кодексі бағыттарында атқарылатын жұмыстары ерекше маңызға ие екендігін атап айтты.
Сенат төрағасы Мәулен Әшімбаев еліміздің мәдени, рухани, тарихи өмірінде Жамбыл облысының алатын орны ерекше екендігіне, шежіресі мыңжылдықтармен өлшенетін көне Тараз қазақ үшін қашанда киелі мекен екендігіне, қазақ хандығының қазығы қағылған жер ретінде де қымбат екендігіне, осы аймақтан ұлттық мүддені ту еткен ірі тұлғалар шыққаны, жалпы Әулиеата қайраткерлік пен батырлықтың, әдебиет пен мәдениеттің алыптары дүниеге келген жер екендігіне ерекше тоқталды.
Мемлекет басшысының бастамаларын іске асыру үшін өңірде ауқымды жұмыс атқарылып жатқаны, сол жұмыстарды талқылап, жұртшылықтың ойлары мен ұсыныстарын тыңдау үшін арнайы ортаға келгенін айта келе, Сенат төрағасы елімізде іске асырылып жатқан кешенді реформалар туралы қысқаша баяндап берді.
Экономиканы әртараптандыруға, өңдеу өнеркәсібі мен ауыл шаруашылығын дамытуға Президентіміздің үлкен көңіл бөліп отырғаны, инвестиция тартуға және жаңа технологияларды енгізуге қатысты нақты міндеттер жүктелгені, облыстардың дамуына жағдай жасауға баса мән берілгеніне тоқталған Мәулен Сағатханұлы нәтижесінде қазіргі таңда өңірлерде жаңа кәсіпорындар іске қосылып, жұмыс орындары ашылып жатқанын жеткізді.
Жамбыл облысында өңдеуші өнеркәсіп, ауыл шаруашылығы, шағын және орта бизнес, әлеуметтік инфрақұрылым сияқты маңызды салаларының серпінді дамуын, жалпы Жамбыл облысы экономикасы тұрақты өсіп келе жатқан өңірлердің бірі екенін баса айтқан Сенат төрағасы осы ретте облыс әкімі Ербол Қарашөкеевтің белсенді жұмысын атап өтті.
Тәжірибелі және білікті басшы Ербол Шырақпайұлының ұйытқы болуымен облыста көптеген іргелі істер қолға алынғаны, биыл жыл басынан бері 545 млрд. теңгеден астам инвестиция тартылғаны, 2025-2028 жылдар аралығында 3,6 трлн. теңгеге 62 инвестициялық жобаларды іске асыру көзделгені айтылды.
Өңірде жалпы құны 76 млрд. теңгеге жуық құрылыс жұмыстары жүргізіліп жатқаны, оның ішінде денсаулық сақтау және білім беру нысандарының көптеп салынуы өте орынды екенін айта отырып, ауыл шаруашылығы, туризм және басқа салаларда да атқарып жатқан жұмыстарды атап өткен Сенат төрағасы 2025 жылғы бюджетті қарау барысында Сенат депутаттары облыстың ұсыныстарын қолдап, тиісті қаражаттарды бөлгенін жеткізді.
Алдағы уақытта да Жамбыл облысынан сайланған Сенат депутаттары Бекболат Орынбеков, Сәкен Арубаев және басқа да депутаттар облыстың жан-жақты дамуына қолдау көрсетуді жалғастыра беретінін айа келе Сенат төрағасы Парламент VIII-шақырылымы lll- ші сессиясын қорытындылағанын баяндады.
Мемлекет басшысының тапсырмаларын заңнамалық тұрғыдан қамтамасыз ету үшін сессияда ауқымды жұмыс атқарылып, жалпы 89 Заң қабылданғанын атап айтқан Сенат төрағасы Мәулен Әшімбаев барлық Заң елімізді дамытуға, азаматтардың құқықтарын қорғап, әлеуметтік жағдайын жақсартуға және мемлекеттілікті одан әрі нығайтуға арналғанын және Заңдарды әзірлеуде Сенат депутаттарымен бірге жергілікті мәслихат депутаттары қатысқанын атап өтті.
Кездесуде облыс әкімі Ербол Қарашөкеев 2024 жыл қорытындысымен өндіріс көлемінің өсуі 4,5 пайызды құрағанын, ал 2025 жылдың қаңтар- мамыр айларының қорытындысымен өнеркәсіп өнімінің көлемі 22,9 пайызға өсіп, экономикалық өсім 16,8 пайыз деңгейінде қалыптасқанын баяндады.
Өңір басшысы атап өткендей, жыл басынан негізгі капиталға тартылған инвестиция көлемі 57,5 пайызға артып, өңірлер арасында Жамбыл облысы көшбасшы болып келеді.
2025 жылы 608 млрд. теңгеге 30 жоба іске асырылуда, оның ішінде 15,4 млрд. теңгеге 36 ауылдық елді мекендерді және 9 тұрғын алқапты ауыз сумен қамту жоспарланған.
Газдандыру мәселесі бойынша 35 елді мекенде құрылыс жұмыстары жалғасуда, оның 9-ы биыл газбен қамтылады.
Бюджет қаражаты есебінен өңірде 2023 пәтерлі 44 тұрғын үй, жеке қаражат есебінен 760 пәтерлі 19 тұрғын үй пайдалануға беріледі.
Кездесу соңында Сенат төрағасы М.Әшімбаевқа мәслихат депутаттары Н.Адилов, Д. Бейсенқұлов, Е. Мағзымбеков, қоғамдық кеңес мүшесі С. Жошыбаев, ардагерлер кеңесінің төрағасы Е.Солтыбаев сұрақтар қойып, толық жауаптар берілді.
Фото
