Тараз қалалық Қоғамдық кеңес БЮДЖЕТКЕ ӨЗГЕРІСТЕР ЖОБАСЫМЕН ҚАТАР, ОДАН ТУЫНДАҒАН ӘРІ ТУЫНДАЙТЫН ӨЗЕКТІ МӘСЕЛЕЛЕРГЕ АТҚАРУШЫ ОРГАНДАРДЫҢ НАЗАРЫН АУДАРДЫ

Тараз қалалық Қоғамдық кеңесте әкімдіктің экономика және бюджеттік жоспарлау бөлімі тарапынан бюджетке өзгерістер енгізу туралы ұсынымы қаралды.

Негізгі назар аударылған мәселелер - "Ұлы дала" шағын ауданындағы көпқабатты үйлерге арналған инженерлік-коммуникациялық нысандардың және саяжайлардағы ауыз су жүйелерінің құрылыстары болды.

Мұнда да жанама сұрақтар мен өзекті жағдайларға мән беруге тура келді.

Атап айтқанда, кеңес құрамы, "Ұлы дала" шағын ауданындағы тұрғын үйлердің жылыту жүйелерінің кілтипандарына тоқталып, әр үйге орнатылған насостардың жиі істен шығуынан, күздің кекесіні мен қыстың қырауында үйлердің суып кетуі, насосты жөндеу мен жаңасына ауыстырудың онсызда пәтерлерді несиеге алып отырған немесе жалдау үстіндегі әлеуметтің әлжуаз топтарынан тұратын қарапайым тұрғындардың қалталарына қосымша салмақ болып отырғанын баса айтты.

Сонымен қатар, аталмыш аудандағы үйлердің сыртқы кірпіштік қабаты сырттан келетін 92-95 градус жылуға арналып соғылғанын, ал, нақтысында жылумен қамтамасыз ететін мекемелермен беріліп отырған температуралық көрсеткіштің бар болғаны 72-75 градусты ғана құрайтынын, бұл өз кезегінде, үйлердің жылуды ұстау қабылетінің төмендеуіне және сыртқы суық ауа-райының қысымына төтеп бере алмауына алып келіп отырғанын сынға алды.

Сондай-ақ, кеңестің талай жылғы сынынан сынаптай сырғып, ауыздық салдырмай, өміршеңдігін көрсеткен кезекті бір өзекті сұрақ - құрылыстарының аяқталуына қарамастан, жылдар бойы тапсырыс беруші әкімдіктің құрылыс бөлімінен, коммуналдық қызмет көрсетуші мекемелердің балансына түрлі сарындағы өзара текетірестің кесірінен, берілмей келе жатқан инфрақұрылымдық нысандардың ахуалы болды.

Оған себеп - саяжайлардағы салынғанына біраз уақыт болғанына қарамастан, әлі күнге қолданысқа енгізілмеген ауыз су жүйелерінің табиғи тозып, ұрлыққа ұшырауына байланысты оларды қалпына келтіріп, ел игілігіне беру үшін қосымша 300 млн-нан астам қаражат қарастыру болды.

Мұндай келеңсіздік - жоғарыда келтіргендей, жауапты атқарушы органдар мен мекемелердің өзара үйлесімді қызметінің болмауының тікелей жемісі және мемлекет қаржысына бас ауыртпаудың жарқын үлгісі демеске амал жоқ.

Жиын барысында, осы және өзге де өзекті мәселелерге Қоғамдық кеңестің құрамы атқарушы органдардың назарын аударды. Әрі десе, Бюджеттік комиссияның жұмысында да қырағылықты күшейтуге басымдық беру қажеттілігіне тоқталды.

Фото

Previous Next