Қоғамдық кеңес отырысы

Атырау облыстық қоғамдық кеңесінде.

Атырау облыстық қоғамдық кеңесі 27 тамыз  күнгі отырысында жылдық жоспарға сай,  «Облыс білім саласының өткен жылғы қорытындылары және оны жақсарту бағытындағы шаралар, жаңа 2025-2026 оқу жылына дайындығы туралы» мәселе қарады. Күн тәртібіндегі мәселе бойынша баяндаманы Білім беру басқармасының басшысы  М.Әбуов жасады.

Отырысқа қоғамдық кеңес мүшелерінен басқа, облыс әкімінің орынбасары Ж.Бисембиев, қала әкімі Ш.Кейкін, басқарма басшылары, бұқаралық ақпарат құралдары қатынасты. Аудан әкімдері, аудандық қоғамдық кеңес төрағалары селекторлық режимде қосылды.

Қоғамдық кеңес мүшелері баяндамашыға білім сапасы, мекетептердің материалдық базасы, балалардың мектепке қатынауы, кадр жетіспеушілігі, т.б қоғамды мазалап жүрген сұрақтарды қойып, жауабын алды.

Отырыста қоғамдық кеңестің Әлеуметтік және мәдени даму мәселелері жөніндегі  комиссия төрайымы  Н.Камалова қосымша баяндама жасады.

Комиссия мүшелері Атырау облысындағы орта білім беретін білім ордаларының жаңа 2025-2026-шы оқу жылына дайындығын зерделеу үшін Атырау қаласында бірқатар  мектептерге барды. Ол мектептердің ішінде күрделі және ағымдағы жөндеу жұмыстары жүргізіліп жатырған мектептер де бар.

Бұған дейінгі жылдардағы зерделеу барысында ағымдағы жөндеулер созбаланған мектептер болған. Биылғы жылы мектептердегі ағымдағы жөндеулер аяқталғаны қуантты.

          Дегенмен кейбір мектептерде өткен оқу жылы аяқталғаннан кейінгі сынық отырғыштар мен парталар, сынған есік пен жуылмаған терезелер бойы мен ойы, жасы өсіп жаңа сыныпқа келген оқушыға жағымсыз әсер қалдыратыны сөзсіз.

          Атырау облысы мектептерінде интернет жылдамдығы төмен болғандықтан мұғалімдер сабақ барысында және цифрлық ресурстармен жұмыс жасау кезінде интернетті өз есебінен пайдалануға мәжбүр. Қала мектептеріндегі үлкен мәселенің бірі–мектеп спортзалдардың жетіспеушілігі немесе мүлде жоқ болуы және мектеп жанындағы ойын алаңдарының жасақталмауы. Ата-аналар тарапынан да сабақ кестесіне қойылып, өтпесе де, өттіге саналып, жалақы төленетін дене шынықтыруға наразылық көбеюде.       

Көп мектептерде желдету жүйесі істен шыққан.

Мектеп аулаларындағы ағаштардың қураған бұтақтары жел мен ылғал қардан құлау қаупі бар.

Мектептердегі ауыз су ішу фонтандары жеткіліксіз немесе істен шыққан.

          Атырау қаласындағы білім ордаларына мониторинг барысында көргеніміздей, облыс орталығындағы кейбір мектептердің аулалары күтімсіз күйде, абаттандырылмаған.

 Атырау қаласында бірнеше жыл бұрын мемлекет қаражатына салынып, бүгінгі күнге дейін пайдалануға тапсырылмаған асхана ғимараттарының балалардың игілігіне жұмыс жасамауы ата-аналар арасында түсінбеушілік туындатып, наразылығын күшейтуде.

2019 жылдан басталып, құрылысы аяқталмай тұрып қалған Атырау қаласындағы 27 мектептің спорт алаңдарының құрылысы мәселесі де назардан тыс қалмауы тиіс.

Соңғы кездері білім ордаларына баса-көктеп кіріп, ұстаздарды видеоға таспалап, жөнді-жөнсіз сөйлейтін блогерлер көбейді. Мектеп қызметкерлерінің абыройына нұқсан келтіретін видеолар желілерде таралып, қоғамда теріс пікір болмауы үшін, блогерлердің мектепке кіруіне шектеу қойылуы керек.

Н.Камалованың баяндамасы бойынша М.Әбуов және қалалық Білім бөлімінің басшысы А.Дүйсекенова түсінік берді.

Отырыс қорытындысы бойынша  қарар қабылданып, орындалысы бақылауға қойылатын болады.

Фото

Previous Next