Новости Казкенес

Тараз қалалық Қоғамдық кеңесте жергілікті зейнеткерлердің санаторлық-курорттық жолдамаларына жергілікті әкімдік тарапынан өтемақы төлеу мәселесі қаралды.

Кіріспе анықтама бере кетсек. Қазіргі уақытта жан басына шаққандағы отбасылық табыс 3 еселенген  ең төменгі күнкөріс деңгейінен аспаса ғана, жолдама құнының 70%-на дейін немесе 45 АЕК көлемінде өтемақы төлену үстінде екен.

Алайда, 2024 пен 2025 жылдың осы уақытына бюджеттен бөлінген 153 846,0 млн қаражаттың 13 940,9 млн-ы  (9% мөлшерлемесінде) ғана игеріліп, ал, 2024 жылға қарастырылған 83 070,0 млн теңгенің 74 005,9 млн-ы, яғни 89%-ы экономия ретінде бюджетке кері қайтарылған. Осының кесірінен 2 жылда өтемақы төлеу жоспарланған 900 зейнеткердің  99-на ғана өтемақы төленген. 

Жиынға қатысушылар: «Бұл дегеніміз - бейнетінің зейнетін көретін жасқа жеткен аға буын өкілдеріне жасалып отырған тікелей қастандық», - деген тоқтамдарын, уәждерін, өпке-наздарын жеткізді.

Осы мәселе бойынша Қоғамдық кеңестің жүргізген сараптамасы көрсеткендей,  ауқымды келеңсіздікке алып келген басты себептер мынадай болып шықты:

  1. «Әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың үлгілік қағидаларын бекіту туралы» Қазақстан Республикасы Үкіметінің 2023 жылғы 30 маусымдағы № 523 қаулысында көрініс тапқан мұқтаж азаматтар қатарына жатқызуға қойылатын талаптар өрескел бұзыла отырып,  жергілікті атқарушы органмен бекітілген қағидада зейнеткерлердің өтінішін қанағаттандыруда пайда түсірер-түсірмесіне қарамастан, атаулы әлеуметтік көмек қағидасы негізге алынып, олардың мүлкіне назар аударылған.
  2. Қаржының жүйелі түрге ене отырып, игерілмеуіне қарамастан, мүдделі жұртшылықты ақпараттандыру ісіне және ынталы тарап үшін қалыптасқан мәселені оңтайлы шешуге қалалық әкімдіктің жұмыспен қамту және әлеуметтік бағдарламалар бөлімі тарапынан мүлдем мән берілмеген, құлықсыздық танытылған.

 

Атап өту керек, жиынға шақыртумен қатысқан облыстық және қалалық жұмыспен қамту және әлеуметтік бағдарламалар басқарма, бөлімдерінің басшылары, өкілдері көршілес облыстар мен республикалық мәндегі қалаларда, қала берді төл облысымыздың аудандарында да бөлінген қаражат жетпей қалып, қосымша сома сұралып жататындығынан хабардар бола тұра, өзекті мәселенің шешу жолдарын қарастырудан гөрі, өздерінің  әрекеттерін ақтаудан арыға бармады.

Сондықтан, Тараз қалалық Қоғамдық кеңес облыстық және Тараз қалалық ардагерлер кеңестері төрағаларының жылдар бойы жергілікті жауапты мемлекеттік органдар тарапынан қанағаттандырылмай келе жатқан жанайқай ұсыныстарын ескере келе, көкейкесті мәселенің шешімі ретінде шипажайлар жолдамаларына өтемақы төлеу көрініс тапқан жергілікті қағидаға шекті жанбасына шаққандағы ең төменгі күнкөріс деңгейіне қатысты табыс көрсеткішін 3 еседен 5-ке дейін көтеру және зейнеткерлерді әлеуметтік табыс деңгейі анағұрлым жоғары зейнет жасындағы өзге әлеуметтік топтардан бөлектеп, жеке тарап ретінде енгізу, оларға өтемақы тағайындауда нақты қаржылай дәлелденген табысына ғана назар аударып, мүлкін есепке алмау жөнінде өзгертулер жасау туралы ұсыным беруге уағдаласты.

 

П.С.: Ел Президенті Қасым-Жомарт Кемелұлы Тоқаев айтқандай, «Еститін мемлекет» құру бағытындағы игілікті ісімізге, бүгінгі жас буынның қазіргідей жайма-шуақ, бейбіт өмірін қамтамасыз еткен аға буын өкілдерінің үмітін ақтау ісімізге сәттілік тілейміз.Және де бұл ұстанымымызға жергілікті атқамінерлер де лайықты жауап қатады деген сенімдеміз.

Фото