Келес аудан Қоғамдық кеңестің мониторингі

Келес аудандық Қоғамдық кеңесінің мүшелері Жүзімдік және Қошқар ата ауылдық округі әкімдіктерінің көгалдандыру жұмыстарының нәтижесіне мониторинг жүргізді.

Жүзімдік ауылдық округі: «Келес қызмет» мекемесі тарапынан 500 дана ағаш көшеттері берілген. Алайда отырғызылған көшеттердің жартысы күннің ыстығы мен шөптің қалың өсуі салдарынан қурап кеткен. Бұдан бөлек ағаш арасына өскен табиғи шөптердің тазаланбауына байланысты, қураған шөптер өртеніп, өрттің кесірінен жартысынан көбі жойылған.

Осы жоғарыда айтылған кемшіліктерді жою мақсатында, әкімдік жергілікті кәсіпкермен келісім-шарт жасасып, алдағы жылға көшеттер өндіріп, өспей қалған көшеттердің орнына егуді қолға алуды жоспарлап отыр.

Қошқар ата ауылдық округі:

Бұл ауылдық округ «Келес қызметтен» 2110 дана ағаш көшеттерін алып, ауыл ішіндегі көшелерге, мектептер аумағына отырғызды. Ағаш отырғызу жұмыстарына ауыл билері мен тұрғындар белсенді түрде атсалысты.

Қорытындысында Қоғамдық кеңестің мониторинг тобы көгалдандыру жұмыстарының атқарылып жатқанын атап өтіп, егілген көшеттерге тұрақты күтім жасаудың және тұрғындарды жасыл аймақты көбейтуге кеңінен тартудың маңыздылығын жеткізді.

Фото

Previous Next