Ұлытау облыстық Қоғамдық кеңесінің мүшелері Қарсақпай ауылында болды

Ұлытау облыстық Қоғамдық кеңесінің мүшелері Аяна Мукеева және кеңес хатшысы Светлана Оңғарбаева Қарсақпай ауылына арнайы іссапармен барды.

Жұмыс тобы ауыл әкімі Асылхан Әлімсейітпен және Қоғамдық кеңес мүшесі Серік Мәшіріппен кездесіп, жергілікті тұрғындардың мұң-мұқтаждары мен өзекті мәселелерін тыңдады.

Іссапардың негізгі мақсаты — ауыл тұрғындарының әлеуметтік жағдайымен танысып, өзекті мәселелерді шешу жолдарын қарастыру болды.

Кенттегі денсаулық сақтау саласында назар аударуды қажет ететін бірнеше мәселе анықталды:

• төрт елді мекенге қызмет көрсететін жалғыз поликлиниканың техникалық базасын күшейту қажет;

• 2017 жылы салынған поликлиника ғимаратына содан бері күрделі жөндеу жүргізілмеген. Соның салдарынан ғимарат шөгіп, терезелер сынып, еден жабындары тозған. Кей кабинеттерде линолеум орнына қораптар төселген;

• бейнебақылау жүйесі мен штаттық бірліктер (сантехник, күзетші, от жағушы) жетіспейді.

Осы және басқа да шешімін таппай жүрген мәселелер жергілікті тұрғын, әрі Ұлытау облысының қоғамдық кеңесі мүшесі Серік Мәшіріпті ұзақ уақыттан бері алаңдатып жүр.

Кездесу барысында ауыл әкімі Асылхан Әлімсейіт «Оңтүстіктен Солтүстікке» бағдарламасы аясында кәсіпкерлердің мамандарға арнап екі тұрғын үй салып жатқанын хабарлады. Бұл – өңірді дамытуға бағытталған маңызды және оң бастама болып табылады.

Фото

Previous Next