Жаңақала аудандық Қоғамдық кеңесінің кезекті отырысы өткізілді

Бүгін аудан әкімдігінің үлкен мәжіліс залында Р.Уразалиев төрағалығымен Қоғамдық кеңестің кезекті отырысы өтті. Отырысқа аудан әкімінің орынбасары Е.Кажиев, аудандық мәслихат төрағасы Қ.Каменов, Қоғамдық кеңес мүшелері қатысты.

Қазақстан Республикасының «Қоғамдық кеңестер туралы» Заңына сәйкес,  Қоғамдық кеңестің резервтік тізіміндегі Имашев Қуат Жарасұлы аудандық Қоғамдық кеңес мүшелігіне қабылданды.

Күн тәртібінде жеті мәселе қаралды. Алғашқы үш мәселе бойынша аудандық жер қатынастары бөлімінің басшысы Е.Бекбулатов аудандық жер қатынастары бөлімі бойынша көрсетілетін мемлекеттік қызметтердің сапасы туралы баяндама жасады. Жаңақала ауданы бойынша 2025-2029 жылдарға арналған жайылымдарды басқару және оларды пайдалану жөніндегі жоспарын бекіту туралы хабарлама жасады. Мәстексай ауылдық округі аумағынан шаруа немесе фермер қожалығын, ауыл шаруашылығы өндірісін жүргізу үшін уақытша өтеулі жер пайдалану (жалға алу) құқығын беру жөніндегі конкурсқа шығарылатын жер учаскелерінің тізбесін бекітуге келісім беру туралы хабарлама хабарлап, келісім берілді. Аудандық қорғаныс істері жөніндегі бөлімінің инспекторы Н.Сахметов аудандық қорғаныс істері жөніндегі бөлімінің азаматтарды мерзімді әскери қызметке шақыруды ұйымдастыру және қамтамасыз ету есебі туралы баяндады. Қазіргі таңда әскерге шақырылушылар арасында әскерге баруға ниетті жастардың аздығы байқалуда. Бұл жағдай жоспардың толық орындалмауына себеп болып отырғаны айтылды. Осыған байланысты, Қоғамдық кеңес мүшелері жастар арасында әскер қатарына барудың маңызын түсіндіретін арнайы кездесулер мен насихат жұмыстары ұйымдастырылуы тиіс деп ұсыныс жасады. Аудан әкімі аппаратының персоналды басқарудың бірыңғай қызметі және құқықтық жұмыстар бөлімінің бас маман заңгері А.Рысқалиева Жаңақала ауданы әкімінің «Жаңақала ауданы аумағында сайлау учаскелерін құру туралы» 2018 жылғы 30 қарашадағы № 9 шешіміне өзгерістер енгізу туралы, аудандық экономика және қаржы бөлімінің басшысы А.Семенов елді мекендегі салық салу объектісінің орналасқан жерін ескеретін аймаққа бөлу коэффициенттерін бекіту туралы және Жаңақала аудандық мәслихатының 2024 жылғы 24 желтоқсандағы «2025-2027 жылдарға арналған аудандық бюджет туралы» № 24-1 шешіміне өзгерістер енгізу туралы хабарламалар жасалып, жобаларына ұсынымдар берілді.

Қоғамдық кеңес мүшелері күн тәртібіндегі мәселелер бойынша сұрақтарын қойып, өз ұсыныс-пікірлерін білдіріп, тиісті ұсынымдар беріліп, отырыс өз жұмысын қорытындылады.

Фото

Previous Next