ФУТБОЛ КЛУБЫН ЖЕКЕШЕЛЕНДІРУ ТУРАЛЫ КӨПШІЛІК ТЫҢДАУ

9 желтоқсан күні облыстық мәслихаттың ұйымдастыруымен «Тараз» кәсіпқой футбол клубын коммерцияландыруға беру бойынша көпшілік тыңдау өткізілді. Іс-шараға спорт саласының мамандары, мәслихат депутаттары, Қоғамдық кеңес мүшелері, футбол жанкүйерлері және қала тұрғындары қатысты.

Тыңдауда сөз алған дене шынықтыру және спорт басқармасының басшысы Е.Ибраимов, «Тараз» кәсіпқой футбол клубының бас менеджері М.Ағыбаев, спорт ардагерлері облыстық кеңесінің төрағасы Т.Қарауылтегі Мемлекет басшысының тапсырмасына сәйкес отандық футбол клубын жекешелендіру және коммерциялық бағытта дамыту қарқынды жүргізіліп жатқанын, «Тараз» футбол клубын жекешелендіру басқарудың тиімділігін арттырып, өңірдің спорттық инфрақұрылымын дамытуға инвестиция тартуға серпін беретінін жеткізді.

Қоғамдық кеңес мүшесі Махамбет Дүйсембаев Президент жыл сайынғы Жолдауларында бұқаралық спортты дамытуға баса мән беретінін, биылғы халыққа Жолдауында кәсіби спортты табыс әкелетін бизнес-индустрия ретінде қарастыруды тапсырғанына тоқталып, елімізде ірі компаниялардың футбол индустриясына қызығушылық танытып жатқанын, жекешелендіру тек клубты басқаруды жеке секторға берумен шектелмейтінін, инвесторларға клуб жанынан балалар футбол академияларын құру міндеті жүктелгенін атап өтті.

Көпшілік тыңдауды қорытындылаған облыстық мәслихаттың депутаты Ф.Жүнісова спортты қаржыландыру негізінен бюджет есебінен жүзеге асырылатыны, алайда соңғы жылдары тиісті нәтижелерге қол жеткізілмегеніне тоқталып, мемлекет басшысының Жолдауына сәйкес футбол клубтарын жекешелендіруге қатысты жұмысты тездету керектігі туралы тапсырма аясында еліміздің 4 футбол клубына белгілі кәсіпкерлер ие болғанын айтты.

Іс-шараға қатысушыларға футбол клубын жекешелендіру барысында қала тұрғындарының барлық әлеуметтік кепілдіктері мен мүдделерінің сақталуын қамтамасыз ету ескерілетіні және тыңдауда көтерілген сұрақтар мен ұсыныстар уәкілетті органдарға қарауына жіберілетіні жеткізілді.

Фото

Previous Next