Новости Казкенес
Новости KazKENESҚоғамдық кеңес отырысы
Облыстық қоғамдық кеңесте «2026-2028 жылдарға арналған облыстық бюджет туралы» жоба қаралды. Жиынға облыс әкімінің орынбасары Жасұлан Бисембиев, мекеме басшылары мен сала өкілдері, қоғамдық кеңес мүшелері қатысты.
Облыс бюджетінің негізгі бағыттарын таныстырған облыстық қаржы басқармасының басшысы Айгүл Әжіғалиева қаражаттың нақты мақсатқа жұмсалуын басты назарға алды. Айтуынша, бес мектепке жапсаржайдың құрылысын жалғастыруға 5 миллиардқа жуық қаржы, яғни әр мектепке 1 млрд. шамасындағы ақша жоспарланған. Ал бір балабақшаны аяқтау үшін 1 млрд. 315 млн. теңге керек.
–Бюджеттің шығыс бөлігінің жобасында мемлекеттік органдардың саясатындағы жекелеген бағыттардың өзгеруі, Мемлекет басшысының жолдауларына, заңнамалық актілерге сәйкес жаңа міндеттер бойынша толықтырулар, сондай-ақ 2025 жылғы бюджеттің атқарылу нәтижелері ескерілді. Экономиканың одан әрі өсуін қамтамасыз ету мақсатында шағын және орта бизнесті, оның ішінде агроөнеркәсіп кешенін одан әрі дамыту, тұрғын үй-коммуналдық шаруашылық инфрақұрылымын және сумен жабдықтау және жылумен жабдықтау желілерін жаңғырту, туризмді дамыту, экономика салаларын цифрландыру және т.б. үшін қолдау және жағдай жасау жалғасуда. Бюджет – халықтың ақшасы. Әр теңге тиімді жұмсалып, қоғамға нақты нәтиже әкелуі тиіс, — деді Айгүл Теміртасқызы.
Ол сондай-ақ әлеуметтік саладағы жобаларды, мектеп және балабақша құрылыстарын сапалы аяқтау, спорттық кешендер мен инфрақұрылымды дамытуға ерекше көңіл бөлу керектігін атап өтті.
Осы тұста қоғам белсендісі Дидар Хамзин бюджет қаражатының кейде жеке компанияларға инвестиция ретінде қайтарылып, тиімді пайдаланылмайтынын сынға алды.
– Жалпы жекеменшік компаниялардың жобаларын бюджеттен қысқарту керек. Есесіне үнемделген ақшаны халық сұранысындағы істерге жұмсаған дұрыс деп ойлаймын. Сондықтан барлық жобаларды сараптап, қатаң бақылауда ұстау қажет, — деді қоғам белсендісі.
Ол жол инфрақұрылымдары мен қоғамдық нысандардағы шығындарды есепке алуды, әрбір теңгенің тиімді жұмсалуын талап етті.
Білім беру саласындағы проблемаларды ашық атап өткен заңгер Салтанат Рахимова, мектеп және балабақша құрылыстарының қымбаттығын, ЖСҚ (проектно-сметалық документация) әзірлеу шығындарының жоғары екенін көрсетті.
–Мысалы, бес мектепке тек жапсаржай салуға – 5 млрд. теңге, үш балабақшаны жалғастыруға – 2,5 млрд. теңге қарастырылыпты. Ал балаларға арналған 2 лагерьдің, гуманитарлық колледждің, кәмелетке толмағандарды бейімдеу орталығының және ерекше балаларға арналған орталықтың құрылыстарына ЖСҚ (ПСД) әзірлеуге 178,9 млн. теңге бөлінген. Құрылыс қымбат екені белгілі, нысандар сапалы және қауіпсіз болуға тиіс. Сондықтан нысан бюджет қаржысына салынған соң, билік тарапынан сұрау болуы керек, — деді заңгер.
Облыс әкімінің орынбасары Жасұлан Бисембиев құрылыс шығындарының өсуін технологиялық және сапалық талаптармен түсіндірді. Ол қазіргі мектептер мен балабақшалар бұрынғыдан әлдеқайда заманауи стандарттарға сай салынып жатқанын атап өтті.
–Қазіргі мектептердің әр бөлмесі, партасы, инженерлік желілері заманауи талаптарға сәйкес келеді. Бұрынғы мектептермен салыстырғанда, шығындар өссе де, сапа артып отыр, — деді Жасұлан Орақұлы.
Қоғамдық кеңес мүшесі Бақыт Шеркешбаева балалардың құқық бұзушылықтан аулақ болуы үшін білім мен тәрбие сапасын жақсарту керектігін айтты. Ол мектепке дейінгі және мектеп инфрақұрылымын дамыту, спорттық кешендер мен колледждерді қолдаудың маңыздылығын атап өтті.
Облыстық қоғамдық кеңес төрағасы Берікқали Сәрсенғалиев ескі құрылыс стандарттарын жаңарту, инфрақұрылымды дамыту және бюджет қаражатын халыққа тиімді бағыттау қажеттігін атап өтті.
– Әр теңгенің тиімді жұмсалуы тек есеп үшін емес, халыққа нақты пайда әкелуі тиіс. Жоспарланған инфрақұрылымдық жобалар, мектеп және балабақша құрылыстары, әлеуметтік салаға бөлінетін қаражаттың барлығы осы қағидатқа негізделуі қажет. Ол үшін жобаның тиімділігіне бақылау жүргізу маңызды роль атқарады, — деді төраға.
Қорытындылай айтқанда, Қоғамдық кеңес мүшелерінің бюджет қаражатын тиімді пайдалану жөніндегі пікірлері мен ұсыныстары назардан тыс қалмайды. Әрбір теңгенің білім беру, денсаулық сақтау және инфрақұрылым сияқты халық үшін маңызды салаларға бағытталуы ортақ мақсат ретінде қарастырылады.
Фото
