Өңірдің бюджет қаражатының игерілуі мен орындалуы

Ақтөбе облыстық Қоғамдық кеңесінің кеңейтілген отырысында өңірдің бюджет қаражатының игерілуі мен орындалу барысына жан-жақты талдау жасалды. Жиында облыстық бюджеттің шығыстары мемлекеттік мекемелер әкімшілендіретін түрлі бағдарламалар аясында қарастырылып, бюджет қаражатының тиімді әрі мақсатты жұмсалуы, әлеуметтік маңызы бар жобалардың іске асырылу деңгейі, сондай-ақ саладағы өзекті мәселелер кеңінен талқыланды.
Кеңейтілген отырыста Ақтөбе облысы бойынша бірқатар басқармалар мен бағдарламалар әкімшілерінің есептері тыңдалды. Атап айтқанда, білім беру, денсаулық сақтау, дене шынықтыру және спорт, туризм, құрылыс, сәулет және қала құрылысы, құжаттама, балалар құқықтарын қорғау, ауыл шаруашылығы, жұмыспен қамтуды үйлестіру және әлеуметтік бағдарламалар басқармаларының бюджет қаражатын игеру көрсеткіштері сараланды.
Отырыста әр сала бойынша бөлінген қаржының игерілу қарқыны, жоспарланған көрсеткіштердің орындалуы, халықтың әл-ауқатын арттыруға бағытталған жобалардың нәтижелілігі мен бюджет қаражатын пайдалану барысындағы өзекті мәселелер көтерілді. Қоғамдық кеңес мүшелері тарапынан мемлекеттік бағдарламалардың орындалу сапасын арттыру, қаржының ашықтығы мен тиімділігін күшейту, әлеуметтік маңызы бар салалардағы жұмысты жетілдіру бойынша нақты ұсыныстар айтылды.
Жиын қорытындысында облыстың әлеуметтік-экономикалық дамуына бағытталған бюджет қаражатын тиімді пайдалану, мемлекеттік бағдарламалардың сапалы жүзеге асырылуын бақылауды күшейту және жауапты мекемелердің жұмыс нәтижелілігін арттыру бағытында бірқатар ұсыныстар қабылданды.

Фото

Previous Next