Новости Казкенес
Новости KazKENESҚОРДАЙ АУДАНДЫҚ ҚОҒАМДЫҚ КЕҢЕСІНІҢ КЕЗЕКТІ ОТЫРЫСЫ ӨТТІ
Қордай аудандық Қоғамдық кеңесінің кезекті отырысы өткізіліп, онда аудан тұрғындарының қауіпсіздігін қамтамасыз ету және халықты жұмыспен қамту саласындағы өзекті мәселелер қаралды. Отырысты Қоғамдық кеңестің төрағасы Н.Молдабеков ашып, күн тәртібіне сәйкес қаралатын мәселелерге тоқталды.
Күн тәртібіндегі бірінші мәселе бойынша аудандық төтенше жағдайлар бөлімінің жазғы кезеңде шомылу маусымы мен өрт қауіпсіздігін қамтамасыз ету бағытында атқарған жұмыстары тыңдалды. Баяндамашы аудан аумағындағы су айдындарында азаматтардың қауіпсіздігін сақтау, қайғылы оқиғалардың алдын алу, тұрғындар арасында түсіндіру жұмыстарын жүргізу, сондай-ақ өрт қауіпсіздігін сақтау бойынша қабылданған шаралар туралы жан-жақты ақпарат берді.
Талқылау барысында Қоғамдық кеңес мүшелері жазғы маусымда тұрғындардың қауіпсіздігін қамтамасыз етуге бағытталған профилактикалық жұмыстарды одан әрі күшейту, халық арасында ақпараттық-түсіндіру жұмыстарын тұрақты жүргізу қажеттігін атап өтті.
Күн тәртібіндегі екінші мәселе бойынша Қордай аудандық мансап орталығының халықты жұмыспен қамту саласындағы мемлекеттік бағдарламаларды іске асыру барысы зерделенді. Орталық өкілдері азаматтарды тұрақты жұмыспен қамту, субсидияланатын жұмыс орындарын ұйымдастыру, жастар тәжірибесі, қоғамдық жұмыстар, алғашқы жұмыс орны және кәсіпкерлікті қолдау бағыттарында атқарылған жұмыстар туралы баяндады.
Қоғамдық кеңес мүшелері мемлекеттік бағдарламалардың тиімділігін арттыру, жұмыссыз азаматтарды еңбек нарығына тарту, жастар мен әлеуметтік осал топтарға көрсетілетін қолдау шараларын кеңейту мәселелері бойынша өз ұсыныстарын білдірді.
Отырысты қорытындылаған Қоғамдық кеңес төрағасы қаралған мәселелердің аудан тұрғындарының әл-ауқаты мен қауіпсіздігін қамтамасыз етудегі маңыздылығына тоқталып, жауапты мекемелерге берілген ұсыныстардың сапалы орындалуын қамтамасыз ету қажеттігін атап өтті.
Отырыстың қорытындысы бойынша күн тәртібінде қаралған мәселелерге қатысты тиісті шешімдер қабылданып, олардың орындалуын бақылауда ұстау туралы айтылды.