ҚАЛАЛЫҚ ҚОҒАМДЫҚ КЕҢЕСІНІҢ КЕЗЕКТІ ОТЫРЫСЫ ӨТТІ

2026 жылдың 24 маусым күні Қызылорда қалалық Қоғамдық кеңесінің жұмыс жоспарына сәйкес кезекті отырысы өтті.

Отырысқа қалалық Қоғамдық кеңес мүшелері, қала әкімдігінің дербес бөлім басшылары, кент және ауылдық округ әкімдері, қалалық төтенше жағдайлар басқармасы, қалалық санитариялық-эпидемиологиялық бақылау басқармасы, Қызылорда облысының ветеринария басқармасы және бұқаралық ақпарат құралдарының өкілдері қатысты.

Қоғамдық кеңестің күн тәртібіне «Суға шомылу кезіндегі жағажайдағы қауіпсіздік шаралары туралы», «Бақша дақылдарымен уланудың алдын алу туралы», «Қаңғыбас ит-мысықтарды аулау туралы» мәселелері шығарылып, талқыланды.

Күн тәртібіндегі бірінші мәселе бойынша Қалалық төтенше жағдайлар басқармасы бастығының орынбасары Ж.Сағадиев хабарлама жасап, қала аумағындағы шомылу маусымы кезеңінде тұрғындардың қауіпсіздігін қамтамасыз ету мақсатында кешенді жұмыстар жүргізіліп отырғандығын және су айдындарындағы жазатайым оқиғалардың алдын алу, қауіпсіздік мәдениетін қалыптастыру және балалардың өмірі мен денсаулығын қорғау бағытында рейдтік, профилактикалық және ақпараттық-түсіндіру шаралары тұрақты түрде ұйымдастырылып жатқанын мәлімдеді.

Қазіргі таңда қала аумағында Қызылорда облысы әкімдігінің 2025 жылғы 3 қыркүйектегі «Су обьектілерінде жаппай демалуға, туризм мен спортқа арналған орындарды белгілеу туралы» №173 қаулысына сәйкес 2 жағажай жұмыс жасайды.

Сонымен қатар, қала аумағындағы суға түсуге тыйым салынған 16 қауіпті учаске толықтай қауіпсіздік тақтайшаларымен жабдықталды.

Күн сайын сағат 12:00-ден 20:00-ге дейін суға түсуге қауіпті аймақтарда басқарма және құтқару жасағы қызметкерлерінің кезекшілігі ұйымдастырылып, тұрғындарға профилактикалық түсіндіру жұмыстары жүргізілуде.

Күн тәртібіндегі екінші мәселе бойынша Қалалық санитариялық-эпидемиологиялық бақылау басқармасының басшысы Б.Бидаш хабарлама жасап, қоғамдық кеңес мүшелері тарапынан қойылған сұрақтарға жауап берді.

Қызылорда қаласында 2026 жылдың 5 айының қорытындысымен жіті ішек инфекцияларының 296 жағдайы тіркелді. Оның ішінде 14 жасқа дейінгі балалар арасында 241 жағдай анықталды. Аурушаңдық көрсеткіші 100 мың тұрғынға шаққанда 80,6 болса, 14 жасқа дейінгі балалар арасында 188,2 құрады.

Бақша дақылдарымен байланысты уланулардың негізгі себептері өнім құрамында нитраттардың рұқсат етілген мөлшерден артық болуы, пестицидтердің қалдықтарының сақталуы, өнімдерді сақтау және тасымалдау талаптарының бұзылуы, санитариялық-гигиеналық талаптардың сақталмауы, сондай-ақ ластанған сумен суару болып табылады.

Сонымен қатар, күн тәртібіндегі үшінші мәселе бойынша Қызылорда облысының ветеринария басқармасының бөлім басшысы О.Мұхидинов хабарлама жасап, бірқатар сұрақтарға жауап берді.

Отырыс соңында Қалалық қоғамдық кеңес мүшелері «Қаңғыбас ит-мысықтарды аулау туралы» мәселенің өзектілігіне және шешілу жолдарын жан-жақты қарастыру мақсатында қала әкімдігімен бірлесіп, талқылауды ұсынды.

Қоғамдық кеңес отырысында айтылған ұсыныс-пікірлер хаттамаға енгізіліп, тиісті мекемелерге жолданатын болады.

Отырыс «Facebook» платформасы арқылы тікелей эфирде көрсетілді.

Жиынға кеңес төрағасы М.Кәрімбаев төрағалық етті.

Фото

Previous Next