ТҮРКІСТАН ОБЛЫСЫ ТӨЛЕБИ АУДАНДЫҚ ҚОҒАМДЫҚ КЕҢЕСТІҢ ҚОҒАМДЫҚ МОНИТОРИНГІ

Төлеби аудандық Қоғамдық кеңесінің төрағасы Әбдісаттар Әбдіхалықов және кеңес мүшелері Манап Құрбанқұлов пен Ғалымжан Ештаев Кемеқалған ауылдық округінің Қарақия елді мекені тұрғындарынан келіп түскен өтініш негізінде елді мекендегі жаңадан салынған асфальт жол мен тротуардың сапасына қоғамдық мониторинг жүргізді. Мониторингке ауылдық округ әкімдігі қызметкерлері де қатысты.
Зерделеу барысында жол жабынының жекелеген бөліктерінде ойылу, асфальт қабатының отыруы мен деформациялануы, сондай-ақ жол жабынының кей жерлерінде шөптің өсуі байқалды. Сонымен қатар, жол құрылысына қатысты анықталған кемшіліктерді жою жөнінде сот шешімі қабылданып, мердігер мекемеге қалпына келтіру жұмыстарын аяқтау міндеттелгені жөнінде қоғамдық кеңес мүшелеріне ақпарат берілді.
Мониторинг кезінде тротуар құрылысында да бірқатар кемшіліктер анықталды. Атап айтқанда, тротуар жабынының кей жерлерінде деформациялар байқалады, асфальт қабатының қалыңдығы жеткіліксіз, жекелеген тұстарында шөп өскен. Бұдан бөлек, автомобиль жолының су өткізу құбырының үстінен өтетін ұзындығы 8 метр, ені 1,2 метр болатын учаскеде тротуардың мүлдем жүргізілмегені анықталды.
Аталған кемшіліктерді жою мәселесі бойынша Төлеби ауданының тұрғын үй-коммуналдық шаруашылық, жолаушылар көлігі және автомобиль жолдары бөлімі заңнама талаптарына сәйкес тиісті жұмыстарды жүргізетін болады.
Қарақия елді мекеніндегі асфальт жол мен тротуарда анықталған кемшіліктердің толықтай қалпына келтірілуі Төлеби аудандық Қоғамдық кеңесінің тұрақты бақылауында болады.

Фото

Previous Next