Новости Казкенес
Новости KazKENESЕгіндікөлде жаңа сауда маркеті ашылды
Егіндікөлде жаңа сауда маркеті ашылды
Егіндікөл ауылында тұрғындарға қолайлы жағдай жасайтын тағы бір жаңа нысан – «Мариям» сауда маркеті өз жұмысын бастады. Кәсіпкер Құттыбаева Айгүл Өмірбайқызы бұрынғы ескі ғимаратты толықтай күрделі жөндеуден өткізіп, заман талабына сай жаңартып, ауыл тұрғындарына жаңа форматтағы сауда орнын ұсынды. Жаңа маркеттің ашылуы аудан тұрғындары мен қонақтары үшін қуанышты жаңалық болды. Салтанатты шараға аудан әкімі Юрий Курушин, аудан тұрғындары, кәсіпкерлер мен қонақтар қатысты. Ашылу рәсімінде аудан басшысы кәсіпкердің еңбегіне жоғары баға беріп, ауылдың әлеуметтік-экономикалық дамуына қосып отырған үлесі үшін алғысын білдірді. Дәстүрге сай жаңа нысанның лентасын Егіндікөл ауданының әкімі Юрий Курушин қиып, кәсіп иесіне сәттілік пен берекелі жұмыс тіледі. «Мариям» сауда маркеті – тұрғындардың күнделікті тұрмысқа қажетті тауарларды бір жерден табуына мүмкіндік беретін заманауи сауда орны. Мұнда жаңа піскен нан және нан өнімдері, сүт тағамдары, ет өнімдері, тәттілер, түрлі сусындар, бакалея өнімдері, тұрмыстық химия, жеке бас гигиенасына арналған заттар, ас үй бұйымдары, көрпе-жастықтар, төсек-орын жабдықтары, балаларға арналған тауарлар, сондай-ақ үйге қажетті көптеген бұйымдар кеңінен ұсынылған. Маркеттің ерекше артықшылықтарының бірі – балғын жеміс-жидек пен көкөністердің мол таңдауы. Сапалы әрі күн сайын жаңартылып отыратын өнімдер сатып алушылардың көңілінен шығып үлгерді. Сонымен қатар барлық тауарлар қолжетімді бағамен ұсынылып, әрбір тұтынушы өзіне қажетті дүниені тиімді бағамен сатып ала алады. Кең сауда залы, тауарлардың ұқыпты орналасуы, сатып алушыларға жайлы жағдай жасалуы және қызмет көрсету мәдениеті – «Мариям» маркетінің басты ерекшеліктерінің бірі. Мұнда әрбір келушінің уақытын үнемдеп, сапалы қызмет алуына барлық мүмкіндік қарастырылған. Ескі ғимаратқа жаңа өмір сыйлап, ауылдың сәулеттік келбетін жақсартқан кәсіпкердің бұл бастамасы жаңа жұмыс орындарының ашылуына да септігін тигізді. Осындай игі жобалар жергілікті кәсіпкерліктің дамуына серпін беріп, тұрғындардың өмір сүру сапасын арттыруға ықпал етеді. «Мариям» сауда маркетінің ашылуы – Егіндікөл ауданы үшін маңызды оқиғалардың бірі. Бұл – ауыл тұрғындарына көрсетілетін қызмет сапасының артып, кәсіпкерліктің қарқынды дамып келе жатқанын айғақтайтын жарқын мысал. Жаңа сауда орны алдағы уақытта да сапалы қызмет көрсетіп, тұрғындардың сенімінен шығады деген сенім мол.
Балшых Ахмарал
Фото
