ҰЛЫТАУ ОБЛЫСЫНДА ЖЫЛЫТУ МАУСЫМЫНА ДАЙЫНДЫҚ БАРЫСЫ ТАЛҚЫЛАНДЫ

Ұлытау облысының Қоғамдық кеңесінің кезекті отырысы өтті. Жиынды Қоғамдық кеңес төрағасының міндетін атқарушы Аяна Мукеева  жүргізді.

Отырысқа облыс әкімінің орынбасары Болат Жұмабеков, сондай-ақ жылыту маусымына жауапты мекеме басшылары қатысты.

Күн тәртібінде 2026–2027 жылдардағы жылыту маусымына жылу энергетикасы нысандарын, электр және коммуналдық желілерді дайындау, көмір жеткізу, қор қалыптастыру және халықты қатты отынмен қамтамасыз ету мәселелері қаралды.

Негізгі баяндама жасаған Ұлытау облысының энергетика және тұрғын үй-коммуналдық шаруашылық басқармасының басшысы Алмас Әлімбекұлы Жандарбеков облыстың жылыту маусымына дайындығы туралы ақпарат берді.

Облыстағы негізгі екі жылу көзі – Жезқазған ЖЭО мен Сәтбаев қаласындағы №1 жылу станциясында жөндеу жұмыстары жүргізілуде. Жезқазған ЖЭО-да 109,6 мың тонна, ал Сәтбаев жылу станциясында 122,8 мың тонна көмір қоры қалыптастырылған.

Облыс бойынша жоспарланған 48,7 км жылу желісінің жөндеуі толық аяқталған. Сонымен қатар 1 272,4 км электр желісі, 40,9 км сумен жабдықтау және 15 км су бұру желісі жөнделді. Тұрғын үйлер мен әлеуметтік нысандардың жылыту маусымына дайындығы 98 пайызды құрайды.

Жылыту маусымына облыс бойынша 201 мың тонна көмір қажет. Қазіргі таңда оның 34,9 мың тоннасы жеткізілді. Көмірді жеткізу жұмыстары жалғасуда.

Отырыс барысында Қоғамдық кеңес мүшелері бірқатар мәселеге қатысты сын-пікірлерін білдірді. Атап айтқанда, кейбір елді мекендерге қатысты мәселелердің толық шешілмей, әлі де күмән тудырып отырғаны айтылды.

Сонымен қатар ПИК-і жоқ көппәтерлі үйлердің жағдайы, оларды жылыту маусымына дайындау мәселелері де көтерілді.

Бұдан бөлек, көгілдір отынмен қамтамасыз ету, яғни елді мекендерді газдандыру мәселесі де талқыланды.

Жиын соңында жауапты органдарға көтерілген мәселелер бойынша нақты жұмыстар жүргізу қажеттігі айтылды.

Фото

Previous Next