Тараз қалалық Қоғамдық кеңестің Төралқасы мен комиссияларының бірлескен отырысы өтті

---

Облыс орталығы аумағындағы республикалық және жергілікті мәндегі тарихи-мәдени ескерткіштер мен ғимараттардың сақталу жағдайы, қалалық АХАТ бөлімшесінің мемлекеттік қызмет көрсету сапасы, "Жасыл ел-Тараз" жауапкершілігі шектеулі серіктестігінің қоқыс шығару тарифін қайта қарау сынды өзекті мәселелер кеңес мүшелерінің назарына ұсынылды.

Қоғамдық кеңестің мониторингтік тобы күн тәртібіне қойылған сұрақтар бойынша жүргізген зерделеу нәтижелері жария етіліп, жетістіктермен қатар, бірқатар кемшіліктердің де бетін ашты.

Атап айтқанда, тарихи ошақтардың сақталуында олардың жағдайын бақылаушы жауапты мекемелер мен жергілікті атқарушы мемлекеттік органдар тарапынан бірлескен жұмыстардың көңіл көншітерлік жағдайда болмауы, бірқатар ескілікті ғимараттардың кезінде жекенің қолына өтіп кетуі, кейбірінің дер кезінде арнайы қорғалымдағы тізімге алынбауы себепті бұзылып кетуі, қалалық АХАТ бөлімшесі тарапынан биылғы жылы қағаз үлгідегі туу туралы мемлекеттік куәліктермен тұрғындарды кешеуілдетіп қамтамасыз етілуі, әлі күнге қалада мамандандырылған Неке сарайының болмауы, қаланың едәуір бөлігін қоқыстан тазартумен айналысатын «Жасыл ел-Тараз» ЖШС қызметінің жаңа жобалық тарифін түзуде жергілікті тұрғындардың орташа жалақы деңгейі сараланбағаны және т.б. мәселелер сын тезіне алынды.

Қаралған мәселелерге қатысты жұмыстарды одан әрі өрістету мен орын алған кемшіліктерді түзеу жөнінде Тараз қалалық Қоғамдық кеңестің ұсынымдары жауапты мемлекеттік мекемелерге жолданды.