Қоғам белсенділері «Самұрық-Қазына» алаңында QazaqGaz жұмысын талқылады

---

Бүгін «Самұрық-Қазынада» Болат Жәмішевтің төрағалығымен Қордың Қоғамдық кеңесінің отырысы өтті. Қоғам белсенділері, саясаткерлер мен сарапшылар «QazaqGaz» ҰК» АҚ-ның 2022 жылғы жұмысының нәтижесін талқылады.

Сауалдарға басқарма төрағасының орынбасарлары Арман Қасенов пен Айдын Ақан жауап берді. Іс-шара ашық форматта өтіп, бұқаралық ақпарат құралдарының назарын аударды.

ҚР өңірлерін газбен қамту

Компания өкілдерінің айтуынша, 2022 жылы QazaqGaz Қазақстан бойынша 160-қа жуық елді мекенді газбен қамтамасыз етті. Былтырдан бастап газға қосу тәртібі жеңілдетілді: техникалық құжаттамалар тізімі 1,5 есе, ал қажет құжаттар тізімі 2 есе қысқарған.

QazaqGaz қалалар мен ауылдардың газбен қамтылуына жауапты екенін, ал газды жеке компаниялар байқау негізінде жүргізетінін атап өтті. Қазақстанда газдандырумен 500-ге жуық компания айналысады, қызмет құны 125 мың теңгеден басталады.

Газ қорының көлемі

Қоғамды елдегі газ қоры алаңдататыны анық. QazaqGaz келер қыста газ тапшылығы болмайтынын айтты. Алдымен республикамыздың газбен қамтылуына басымдық беріліп, содан кейін ғана газ экспортталады.

Компания Қазақстандағы газ қоры 100 жылдан астам уақытқа жететінін хабарлады. 2022 жылы Қазақстанда 21 млрд текше метр газ пайдаланылған, 5 млрд текше метр газ экспортталған. Қазір елімізде өндірілетін газ қоры 3,8 триллион текше метрге тең. Бұл былтырғы пайдаланған газ бен экспортталған газ көлемінен 146 есе көп. Негізгі газ қоры Қарашығанақ, Теңіз, Қашаған және Жаңажол сияқты төрт ірі кен орнында шоғырланған. Ондағы газдың жалпы көлемі – 2,7 трлн текше метр.

Назардағы басты жобалар

QazaqGaz Қазақстан өңірлеріндегі басымдық берілетін жобаларға да тоқталып өтті. Олардың қатарында Қашағанда газ өндеу зауытын (ГӨЗ) салу бар. Былтыр жоба қайта қолға алынып, қазір онда құрылыс-монтаж жұмыстары жүргізіліп жатыр. Зауыт 2025 жылы қолданысқа берілмек. Зауыт қуаты жылына 1 млрд текше метр шикі күкірт газын құрамақ. Оны ГӨЗ-де өндеп, одан тазартылған сатуға дайын газ, сұйытылған газ, күкірт және газ конденсатын алады. Бұл елді газдандыруға, газ химиясын дамытуға септігін тигізеді.

Басқа жобаларды атап өтсек, Қазақстан бойынша жаңа газ құбырларын салу жоспарланып отыр. Мәселен, «Бейнеу-Бозой-Шымкент» газ құбырының екінші желісі еліміздің оңтүстік, орталық және солтүстік өңірлерге батыс кен орындарынан өндірілген газды жеткізуге мүмкіндік береді. «Сарыарқа» газ құбыры құрылысының 2 және 3 кезеңдерін аяқтау арқылы солтүстік өңірлерді газбен қамтамасыз етуге болады. «КС-14 - Рудный» газ құбыры Қостанай облысының газ қажеттілігін өтейді.

Сарапшылар сауалы

Табиғи газға қатысты тақырыптар қоғамда жиі талқыланады. Сондықтан Қоғамдық кеңестің кезекті отырысы QazaqGaz жұмысына арналуы қоғам белсенділері мен сарапшылардың қызығушылығын тудырды. Мәселен, Қазақстан Республикасы Сенатының депутаты Ольга Булавкина Қазақстанның шығысын таза отынмен қамтамасыз ету үшін Ресей газын тарту жоспарланып отырғаны туралы ақпараттың рас-өтірігін сұрады. QazaqGaz Басқарма төрағасының орынбасары Арман Қасенов Газпромға Шығыс Қазақстан арқылы Қытайға жаңа газ құбырын жүргізу туралы ұсыныс жіберілгенін айтты.

Қазақстанның газ-мотор қауымдастығының қызметкері Азамат Әкішев елімізде автомобиль көлігін газға ауыстыру қарқынын арттыру маңызын, ол үшін отынның басым көлемін босату қажет екенін білдірді. QazaqGaz қазіргі жағдайда газдың қосымша көлемін тек шетелден импорттық бағамен тартуға болатынын айтты. Салалық қауымдастық пен QazaqGaz бұл мәселені жеке алаңда қосымша талқылауға келісті.

Отырыста Алматыдағы ЖЭО мәселесі де талқыланды. Қазір жаңа станцияның құрылысымен «Самұрық-Энерго» компаниясы айналысады. QazaqGaz 2-ЖЭО және 3-ЖЭО үшін сыртқы газ инфрақұрылымын салып жатыр. Сарапшылар жаңа станцияларға газдың қандай бағамен жеткізілетінін сұрады. Компания отын үнемдеу саласындағы басқа тұтынушылармен бірдей бағамен белгіленетінін жеткізді. Бұл жанармай бағасының жылына 15 пайыз өсуін көздейді. Осы ретте газдың бөлшек және көтерме бағасын Энергетика және Ұлттық экономика министрліктері бекітетінін айта кеткен жөн.

«Газ мәселесі барлығы үшін өте маңызды. Қазақстанда газ тапшылығы неғұрлым көп болса, саладағы процестерді басқарудың бірыңғай мемлекеттік саясаты соғұрлым айқын болуы тиіс», - деп түйіндеді Қоғамдық кеңес төрағасы Болат Жәмішев.