«Самұрық-Қазына» қоғамдық кеңесі Қордың 2022 жылғы жұмысын бағалады

---

Бүгін Астанада Болат Жәмішевтің төрағалығымен Қордың 2022 жылғы қызметіне арналған «Самұрық-Қазына» қоғамдық кеңесінің ашық отырысы өтті.Жұмыс қорытындысы туралы басқарушы директорлар, сондай-ақ «Самұрық-Қазына»тобының портфельдік компанияларының басшылары айтып берді.

Оң қаржылық нәтижелер

2022 жылы «Самұрық-Қазына» компаниялары тұрақты өсуді қайта бастады. Мұны қаржылық көрсеткіштердің жақсаруы көрсетеді. 2022 жылдың қорытындысы бойынша «Самұрық-Қазына» тобының кірісі 14 785 млрд теңгені құрады. Бұл 2021 жылмен салыстырғанда 26%-ға көп. Таза пайда рекордтық 1 922 млрд теңгеге жетті. Бұл өткен жылмен салыстырғанда 18%-ға көп.

Қор тобының стратегиялық ҚТК-сы орындалды: таза активтердің құны, еңбек өнімділігі және шикізаттық емес тауарлар мен қызметтерді шығару өсті. Портфельдік компаниялардан 493 млрд теңге дивиденд алынды. Бұл бір жыл бұрынғыдан екі есе көп. Қазақстан Үкіметіне «Самұрық-Қазына» дивидендтері 302 млрд теңгеге дейін өсті. Оның 170 млрд тікелей мемлекеттік бюджетке, қалғаны - түрлі әлеуметтік шығындарға жұмсалды. Дивидендтік саясатты орындау 124%-ды құрады.

Портфельдік компаниялардың рөлі

Отырыста ҚМГ, ҚТЖ, Қазатомөнеркәсіп, KEGOC сияқты «Самұрық-Қазына»тобының ірі портфельдік компанияларының өкілдері сөз сөйледі. Олар Қазақстан экономикасына өз ықпалы туралы, оның ішінде негізгі бизнес-көрсеткіштер: қызметкерлердің саны мен жалақысы, дивидендтер көлемі, қаржылық және әлеуметтік тұрақтылық туралы айтып берді.

«Самұрық-Қазына» өкілдері Қордың компаниялар тобы Қазақстанның экономикасына айтарлықтай экономикалық әсер ететінін айтты. Ол шамамен 7,55 трлн теңгені құрайды. Бұл сомаға мемлекеттік бюджетке салықтар, үкіметке акционер ретіндегі төлемдер, инвестициялық жобалар, қазақстандық өндірушілерден сатып алулар және басқа да көрсеткіштер кіреді.

«Қордың рөлі компаниялардың тиімділігін арттыру арқылы дивидендтер түріндегі түсімдерді ұлғайту. Сонымен қатар, қазір әлеуметтік әділ тарифтік жүйені енгізу үлкен міндет болып отыр, бұл компанияларға кірістерді ұлғайтуға мүмкіндік береді», - деді Назира Нұрбаева.

Қоғам мәселелері

«Самұрық-Қазына» қоғамдық кеңесінің отырысы дәстүрлі түрде сыртқы сарапшыларды тарта отырып, ашық форматта өтті. Оларды Қор жұмысының Қазақстан Үкіметіне дивидендтері, сатып алулар, әлеуметтік жауапкершілік сияқты аспектілері қызықтырды. Мысалы, ұлттық ESG-клубының басшысы Айдар Қазыбаев ҚТЖ-ның жасыл облигацияларының келешегі туралы сұрады. Компания өкілдері «бұл қаржыландыруды тартудың маңызды құралы, бірақ оларды шығару үшін мемлекеттің келісімі қажет»,- деп жауап берді.

Қазақстан Республикасы Президенті жанындағы Қазақстандық стратегиялық зерттеулер институтының қызметкері Алуа Жолдыбалина әлеуметтік шиеленісті тудыратын ҚТЖ пойыздарының кешігу проблемасын көтерді. «Бұл мәселені түбегейлі шешу үшін біз Deutsche Bahn неміс компанияларымен жолаушылар тасымалын басқармаға алып, мәселені шешу үшін келіссөздер жүргізіп жатырмыз», - деп жауап берді компания басшысы Нұрлан Сауранбаев. Ол «Жолаушылар тасымалы» АҚ жанынан компания деңгейінде азаматтардың мүдделерін қорғайтын қоғамдық кеңес құру жоспарланып отырғанын айтты. ТАЛАП қолданбалы зерттеулер орталығының қызметкері Рахым Ошақбаев ҚМГ-дан қаржылық есептілікті қалыптастыру принциптерін түсіндіруді сұрады. Компания басшылығы тиісті түсініктемелерді берді. «Бүгін біз Қор тобының компаниялары жүргізіп жатқан жұмыс және олардың еліміздің әлеуметтік-экономикалық дамуына тигізетін әсері туралы айтуға тырыстық. Бүгінгі жұмыс үшін қатысушыларға алғыс айтқым келеді», - деп қорытындылады Болат Жәмішев.