Қазақстандықтарды сапалы байланыс қызметтерімен қамтамасыз етуге «Қазақтелеком» шамамен 370 млрд теңге жұмсамақшы

---

«Самұрық-Қазынада» Қордың Қоғамдық кеңесі барысында «Қазақтелеком» қызметінің нәтижелерімен танысты. Еліміздің ірі интернет-провайдері және операторы «Самұрық-Қазына» АҚ Қоғамдық кеңесінің отырысында 2022 жылғы қызметінің нәтижелері туралы есеп берді. «Қазақтелеком» өкілдері қаржы-шаруашылық көрсеткіштерінен басқа іске асырылған және жоспарланған жобалар, халықты телекоммуникациялық қызметтермен және сервистермен қамтамасыз ету, қалалар мен ауылдық жерлердің тұрғындары арасындағы цифрлық теңсіздікті төмендету бойынша қабылданып жатқан шаралар туралы айтып берді.

Бүгінде бас компанияның және оның еншілес құрылымдарының КЖҚ-ға қол жеткізу қызметі бойынша абоненттік базасы 1,9 млн-нан астам абонентті құрайды, «Қазақтелеком» тобына кіретін ұялы операторлар – «Кселл» АҚ және «МТ-С» ЖШС 14,5 млн абонентке қызмет көрсетеді, бұдан басқа компания ақылы телевидение сегментінде тағы 931 мың абоненттің санын көрсетіп отыр.

Сонымен қатар «Қазақтелеком» АҚ бүкіл ел бойынша 7 мыңнан астам мектепті, 6 мыңға жуық аурухананы және 17 мыңға жуық мемлекеттік мекемелерді байланыспен және кең жолақты қолжетімділікпен қамтамасыз етеді. Фискалдық деректер операторы ретінде компания 560 мыңнан астам бизнес субъектілеріне қызмет көрсетеді, 300 мыңнан астам белсенді бақылау-кассалық машиналары бар. Жалпы компанияның инфрақұрылымына 87 000 км-ден астам оптикалық желілер, 14 000-нан астам базалық станциялар, 27 деректер орталығы, 40 000 қалалық бейнебақылау камералары кіреді.

«Ел деңгейіндегі басым міндеттердің бірі – қала мен ауыл арасындағы цифрлық теңсіздікті төмендету, осы тұрғыда біздің компания оны шешуде белсенділік танытып отыр. Соңғы бірнеше жылда бұл бағытта бірқатар шаралар қабылданды: мәселен, компания республика ауылдарына 14,5 мыңнан астам оптикалық желі салды, «радиомкөпір», FWA, GPON жобалары іске асырылып, 5G базалық станцияларының инсталляциясы белсенді жүргізіліп жатыр.

Сонымен қатар біз қазіргі уақытта қалыптасып жатқан «қолжетімді интернет» ұлттық жобасына өз жобаларымыздың жеке портфелін ұсындық. Мұның бәрі, сайып келгенде, цифрлық теңсіздікті төмендету жөніндегі мақсатқа қол жеткізуге мүмкіндік береді және әрбір қазақстандық қай жерде тұратынына және оның үйі облыс немесе аудан орталығынан қаншалықты алыс екеніне қарамастан-барлық заманауи телекоммуникациялық және цифрлық қызметтер мен сервистер қолжетімді болады», - деді Қоғамдық кеңес отырысы барысында «Қазақтелеком» АҚ Басқарма төрағасы Қуанышбек Есекеев.

Компанияның қаржылық көрсеткіштеріне ерекше назар аударылды. «Қазақтелеком» АҚ бас қаржы директоры Людмила Атамұратова Қоғамдық кеңес мүшелерімен компаниялар тобының 2022 жылғы негізгі қаржылық-экономикалық жетістіктерімен бөлісті. Атап айтқанда, 2022 жылдың қорытындысы бойынша жарияланған шоғырландырылған есептілікке сәйкес Топтың кірісі 7%-ға ұлғайып, 2021 жылғы 594 млрд теңгеге қарағанда 634 млрд теңгені құрады, таза пайда 128 млрд теңгеден асып, бір жылда 32%-дан астам өсті. Бұл ретте кірістің өсуіне қызметтердің тіркелген және мобильді сегменттерінде қол жеткізілді.

«Мұндай нәтижелерге біз негізгі қызметтен түсетін кірісті ұлғайтуға, операциялық көрсеткіштерді жақсартуға ғана емес, сонымен қатар шығындарды оңтайландыруға және қызметтің басқа бағыттары бойынша тиімділікті арттыруға бағытталған күш-жігердің арқасында қол жеткіздік. Мәселен, 2021 жылмен салыстырғанда компаниядағы жалпы және әкімшілік шығыстар 10%-ға қысқарды, қаржылық шығыстар 13%-ға төмендеді, ал кірістер шамамен 3 есеге өсті. Өткен жылы біз елдің телеком-инфрақұрылымын дамытуға 121,5 млрд теңге инвестиция салдық, бұл 2021 жылмен салыстырғанда 20%-ға артық. Біздің топтың инвестицияларының үлесіне елдегі «Ақпарат және байланыс» бағыты бойынша негізгі капиталға салынған инвестициялардың жалпы көлемінің шамамен 70%-ы тиесілі екенін атап өтемін», - деді «Қазақтелеком» АҚ бас қаржы директоры Людмила Атамұратова.

Жалпы қазақстандықтарды заманауи телеком-қызметтермен қамтамасыз ету үшін өз инфрақұрылымын дамытуға таяудағы бірнеше жылда «Қазақтелеком» Компаниялар тобы шамамен 370 млрд теңге инвестиция салуға ниетті.

Ауылдық елді мекендерді интернетпен қамтамасыз ету жұмыстарына ерекше назар аударылды. Ағымдағы жылдың 4 айында телеком-оператор республиканың 10 ауылында «радиокөпір» технологиясы бойынша 1500-ден астам үй шаруашылығын интернетке қосты. 160 ауылдық елді мекенде 10 мыңнан астам ауыл тұрғыны «Қазақтелекомның» жаңа «радиокөпірін» орнату есебінен телеком-қызметтермен қамтамасыз етуді жоспарлап отыр. Сонымен қатар LTE сымсыз технологиясы бойынша жылдам интернет пен сапалы байланысқа бүкіл ел бойынша тағы 50 мың жаңа абонент қосылады.

«Қазақтелеком» АҚ-ның бірінші басшысы хабарлағандай, 2022 жылдың желтоқсанында операторлар консорциумы - «МТ-С» ЖШС және «Кселл» АҚ атынан 5G енгізу үшін жиілік аукционында жеңіске жетті. Талаптарға сәйкес компаниялар 2027 жылға дейін бүкіл ел бойынша 7 мыңнан астам 5G базалық станцияларын орнату міндеттемелерін қабылдады. Бұл ретте Астана, Алматы және Шымкенттегі 390 базалық станция 2023 жылы пайдалануға беріледі. Ағымдағы жылдың бірінші жартыжылдығында Компаниялар тобы бесінші буынның байланыс стандартын енгізу жөніндегі жобаға шамамен 160 млрд теңге инвестиция салуды жоспарлап отыр.

Сондай-ақ «Қазақтелеком» басшысы өткен жылы компания «Azertelecom» компаниясымен «Әзірбайжан-Қазақстан» бағыты бойынша Каспий теңізінің түбінде талшықты-оптикалық байланыс желісін салу жөніндегі жобаны бірлесіп іске асыру туралы келісімге қол қойғанын хабарлады. Транскаспий каналының негізгі маршруты Ақтаудан Әзірбайжан Сиазанына дейін өтеді және 340 км-ден асады, ұзындығы 330 км-ге жуық резервтік желі қазақстандық Құрық портынан Баку маңындағы Бузовна пунктіне дейін салынады.

Отырысты қорытындылай келе, Қоғамдық кеңестің төрағасы Болат Жәмішев байланыс операторы нарықтың мықты ойыншысы ғана емес, сонымен қатар корпоративтік басқару саласындағы елдегі үздік компания бола алатынын атап өте келе: «Компания жоғары технологиялық салада жұмыс істейді және ең үздік әлемдік стандарттарға бағдарланады, өйткені біздің еліміз интернет-технологияларды және технологиялық жоспарды пайдалану бөлігінде бәсекеге қабілетті болуға ұмтылады. Осындай жағдайда сіздер іс жүзінде корпоративтік басқару бөлігінде үздік компания бола аласыздар. Ол үшін процестердің ашықтығын қамтамасыз ету, есептілік пен жоспарларды жүйелі түрде көрсету, жұмыскерлерге қамқорлық жасау және қалалар мен ауылдардың тұрғындарын сапалы қызмет көрсетумен қамтамасыз ету бойынша өздеріңізге қабылдаған барлық міндеттемелерді орындауларыңыз қажет», - деп баса айтты Болат Жәмішев.

Отырыс нәтижелері бойынша байланыс операторына ұсынымдар жіберіледі және олардың іске асырылуын бақылау қамтамасыз етіледі.

Анықтама: «Самұрық-Қазына» қоғамдық кеңесі Қорда азаматтық қоғамның мүдделерін білдіретін және Қор тобының компанияларында шешім қабылдау кезінде жұртшылықтың пікірін ескеруге жәрдемдесетін консультативтік-кеңесші және байқаушы орган. Сондай-ақ Қоғамдық кеңестің қызметі қоғамға есеп беруді және «Самұрық-Қазына» мен оның портфельдік компаниялары қызметінің ашықтығын арттыруға жәрдемдесуге бағытталған.