«Облыс білім саласының өткен жылғы қорытындылары және оны жақсарту бағытындағы шаралар, жаңа 2023-2024 оқу жылына дайындығы туралы»

---

           Атырау облыстық Қоғамдық кеңесінің кезекті отырысы өтті

 

2023 жылдың 21 тамызында Қазақстан Республикасының 2015 жылғы 2 қарашадағы "Қоғамдық кеңестер туралы" Заңына сәйкес кезекті отырысы «Облыс білім саласының өткен жылғы қорытындылары және оны жақсарту бағытындағы шаралар, жаңа 2023-2024 оқу жылына дайындығы туралы» мәселеге арналды. Кеңес отырысын төраға М.Ізбасов ашып, жүргізді.

Кеңеске облыс әкімінің орынбасары Ж.Бисембиев, басқарма басшылары, БАҚ өкілдері қатысты.   

Күн тәртібіндегі мәселе бойынша Білім беру басқармасының басшысы Е.Сламбеков баяндады. Отырыста «Білім беру саласына жүргізілген сыбайлас жемқорлық тәуекелдерін сыртқы талдау қорытындылары туралы» Сыбайлас жемқолыққа қарсы іс-қимыл агенттігінің Атырау облысы бойынша департаменті қызметкері баяндама жасады.

Кеңестің кезекті отырысындағы күн тәртібіне қойылған мәселе бойынша кеңес мүшелері мүмкіндігінше қала мектептеріне барып, зерделеу жұмыстарын және әлеуметтік желіде халық арасында сауалнама жүргізді.

Аудан мектептерінің жаңа оқу жылына дайындығы туралы ақпараттар аудандық Қоғамдық кеңестерден алынды.

Зерделеу қорытындылары бойынша облыстық қоғамдық кеңестің  Әлеуметтік және мәдени даму мәселелері жөніндегі комиссияның төрайымы Н.Камалова қосымша баяндады.

Қала мектептерінде зерделеу жұмыстары барысында мектептің жөндеу жұмыстары қоғамдық кеңес мүшелерінің басты назарында болды. Күрделі және ағымдағы жөндеу жүргізіліп жатқан барлық мектептердің мәселесі бұл қаражаттың кеш аударылуы.

Сонымен қатар, мектеп директорларының тапсырысты кеш жасақтауы, мемлекеттік сатып алудың кеш жариялануы, қалалық қаржы бөлімінде құжаттардың бөгелуі, мердігерлердің жауапсыздығы сияқты мәселелер де бар.

2021 жылдан бастап білім беру саласында басқару жүйесі өзгеріп, қаржыландыру және басқару құзыреті облыстық білім беру басқармаларына берілді. Бірақ, тәжірибе көрсеткендей, бүгінгі күні бұл тиімсіз болып отыр.

Сол аумақтық бірлікте орналасып, сол жердің балаларын оқытатын болғандықтан, аудан бюджетінің 70 пайызы білім беру саласына бөлінетіндіктен білім басқармаларын жергілікті әкім бақылауға алып, білім басқармалары жергілікті әкімдерге есеп беруі тиіс. Білім ошақтарында басқа да шаруашылық мәселелер орын алса, әкім арқылы шешу оңайырақ.

Мектептердің абаттандырылуы қолға алынуы керек.

Облыстық Қоғамдық Кеңес мүшелері облыстағы білім беру ошақтарында зерделеу жұмыстарын әр апта сайын жоспарлы түрде жалғастыратын болады.

Баяндамада айтылған мәселелер бойынша және кеңес мүшелерінің басқа да сауалдарына мемлекеттік орган өкілдері жауап берді.

Төраға М.Ізбасов көтерілген тақырып бойынша өзекті мәселенің қозғалғанын, ұсыныс-пікірлер ескеріліп Қарар қабылданып, құзырлы мекемелерге жолданатынын, облыстық Қоғамдық кеңес өзіне берілген өкілеттіктер шегінде бақылаушы міндетін жүйелі алға қойып жұмыстар жалғасатынын айтып өтті.

 

Атырау облыстық Қоғамдық кеңесі