Тараз қаласы мен оның маңындағы елдімекендердің экологиялық ахуалы қоғамдық тыңдауға арқау болды

---

Тараз қалалық Қоғамдық кеңестің ұйымдастыруымен,  «Достық» үйінде «Тараз қаласы аумағы мен оның маңында қоршаған ортаны қорғаудың, атмосфералық ауаның жай-күйі, оның сапасын ҚР Экологиялық кодексі талаптарына сәйкес жақсарту мәселелері туралы» қоғамдық тыңдау өтті.

Оған Тараз қаласы, Жамбыл, Байзақ аудандарының тұрғындарымен қатар облыстық, қалалық, аудандық деңгейдегі атқарушы, қадағалаушы мемлекеттік органдардың өкілдері, облыстық және қалалық ардагерлер кеңесінің, Тараз қалалық, Жамбыл, Байзақ аудандық Қоғамдық кеңестердің мүшелері, мәслихаттардың депутаттары, қоғамдық ұйымдар мен саяси партиялардың, бұқаралық ақпарат құралдарының өкілдері және қоғам белсенділері және т.б. қатысты.

Қоғамдық тыңдауда Тараз қалалық Қоғамдық кеңестің мониторингтік тобы әзірлеген сараптамалық-талдамалық анықтама көпшілік талқысына ұсынылды. Онда қоршаған ортаны ластап отырған өндіріс орындарынан бастап, тұрмыстық қалдыққа дейінгі мәселелер, олардың зиянды әсері жан-жақты баяндалды.

Ал, жарыссөзге шыққан Тараз қалалық Қоғамдық кеңестің мүшесі, «Байтақ» саяси партиясы Жамбыл облыстық филиалының төрағасы С.Қойбақов Тараз қаласындағы тұрмыстық қатты қалдықтарды, шайынды суларды жинаудан бастап, оларды пайдалы кәдеге асыруға дейінгі әрекеттерді бір кешенді бағдарламаға тоғыстырып, қала деңгейінде қабылдаудың, бағдарлы жұмысты осылау жүйелеудің маңыздылығын, керектігін атқарушы органдарға ұсынды.

Жиын соңы сұрақ-жауапқа ұласты. Сөз алған тұрғындар «Қазфосфат» ЖШС-нің облыс орталығының ішіндегі және маңындағы тау болуға жақын қалған үйінді қалдықтарының зардабын ашына айтып, ауа мен судың қатар бүлініп жатқанын, үйінділердің айналасында өсімдік атаулының жойылып кеткенін, ендігі кезекте Жамбыл ауданының Бірлесу-Еңбек ауылы жанында тағы гектарлаған жерге зауыт қалдықтарын тастап, ауыл тұрғындарының онсыз да тар жайылым алқабы мен экологиялық ахуалын ушықтырып отырғаны туралы ызалы уәждерін жеткізді.

Ал, Тараз қаласының тұрғындары қураған, қараусыз қалған тал-дарақтарға, жекелеген азаматтар тарапынан заңсыз нәжіс жиналатын септиктер салудың көбеюіне, олардың бірқатарының арық-атыздарға қасақана бағытталып, құйылып жатқанына, ирригациялық жүйелердің жұмысына жеткілікті назар аударылмауына,  ілгеріде халық арасында жап-жасыл қала атауына ие болған облыс орталығының қазіргі сиқы сол атауға лайықсыздығына жергілікті атқарушы және бақылаушы органдардың назарын аударды.

Қоғамдық тыңдауды қорытындылаған, Қоғамдық кеңес төрағасы С.Сейдәзімов анықтама мен азаматтардың сөзінде баяндалған өзекті мәселелердің барлығы қағаз бетіне түсіріліп, жауапты мемлекеттік органдарға жолданатынын, орындалуына баса мән берілетінін айтты.