Қазкеңес жаңалықтары

Қызылқоға ауданының мектептеріндегі асханаға мониторинг жасалуда

2023-2024 оқу жылында еліміз бойынша барлық мектептерде халықтың осал тобына жататын балалармен қатар, бастауыш сынып оқушылары да толықтай ыстық тамақпен қамтылуда. Осы орайда аудандық қоғамдық кеңес мүшелерінен құрылған мониторингтік топ мүшелері, мектеп асханаларының тамақ сапасына мониторинг жүргізу мақсатында Миялы ауылындағы Ы.Шөреков, Б.Аманшин, Х.Досмұхамедов атындағы орта мектептерге барып, оқушыларға беріліп жатқан тамақтың сапасын зерделеп, оқушылармен, мұғалімдермен, мектептегі бракераж комиссиясының мүшелерімен пікірлесті. Аталған бағыттағы жұмыстар ауданға қарасты 10 ауылдық округтерде де жүргізіліп, келер аптада қорытындысы шығарылатын болады.

Айта кетейік, Аудан бойынша 15 мектепте 2981 бала тегін ыстық тамақпен қамтылып отыр. Оның 1-4 сыныпта 2428 бала (аз қамтылғаны- 408), 5-11 сыныпта 553 бала. Оның ішінде 2 мектепті (Х.Досмұхамедұлы, Ы.Шөреков) ЖК «Жаңагүл», қалған 13 мектепті ЖК «Нурмагамбетова М.А.» конкурстық негізде ұтып алып, ыстық тамақпен қамтуды ұйымдастыруда. Барлық 15 мектептің асханалары жеке кәсіпкерлерге келісім шартпен жалға берілген.