Оқушыларды ыстық тамақпен қамту мәселесі тыңдалды

---

ОҚУШЫЛАРДЫ ЫСТЫҚ ТАМАҚПЕН ҚАМТУ МӘСЕЛЕСІ ТЫҢДАЛДЫ

 

27 қараша Қызылқоға аудан әкімдігінің кіші мәжіліс залында кеңейтілген қоғамдық кеңес отырысы өтті. Отырысты аудандық қоғамдық кеңес төрағасы Жания Ізбасқан жүргізіп, аудан әкімі қатысты. Сонымен қатар жиынға жауапты сала- бөлім басшылары, мектеп директорлары, жеке кәсіпкерлер қатысты.

Кеңес отырысының негізгі күн тәртібіндегі мәселе оқушылардың ыстық тамақпен қамтылуы бойынша аудандық білім бөлімінің басшысы Г.Әнжанованың айтуынша аудан бойынша 15 мектепте 2981 бала тегін ыстық тамақпен қамтылған. Оның ішінде 1-4 сыныпта 2428 бала (аз қамтылғаны- 408), 5-11 сыныпта 553 бала. Конкурстық негізде ЖК «Жаңагүл» және ЖК «Нурмагамбетова М.А.» ыстық тамақпен қамтуды ұйымдастыруда.  Асхананың материалдық  базасы, бракераждық комиссия жұмысы, ас мәзірі және оның берілуі бойынша негізгі ақпараттарды айтып өтсе, қоғамдық кеңес мүшесі Ж.Ибрашов ауданның 11 мектебінің асханасына жүргізілген қоғамдық бақылау және ата-аналарға жүргізілген сауалнама нәтижесі туралы баяндап өтті.

Мониторинг барысында қара бидай нанының орнына ақ нан берілгені, аспазшы пирожкиге арнайы пісірген картоптың сырты қабығы мен аршылған қабығының бір ыдыста санитарлық талаптарды сақтамай орындауы, қол жуатын құрылғы мен қол кептіргіш аппараттың істен шығуы, балалардың дәмсіз тағам жеуі, ет өнімі аз плов салқын күйде балаларға ұсынылуы секілді бірқатар кемшіліктер анықталды.

Соған сәйкес, асханаларда санитарлық талаптарының сақталуы, күнделікті ас мәзірінің сәйкестігін бақылау нәтижесінде оқушылардың кейбір тағам түрлерін жемейтіні, асханалардың типтік стандартқа сәйкес мәселелері айтылып, облыстық білім басқармасымен бекітілген ас мәзіріне өзгеріс енгізу, гигиеналық тазалықты сақтау бойынша дәрістер өткізу, тағам құнарын бақылайтын диетолог мамандардың болуын қамтамасыз ету мәселелері ұсыныс ретінде айтылды.

  Кеңес отырысын қорытындылаған аудан әкімі Қанат Әзмұханов: «Мектептерді аралаған сәтте ең бірінші асханаға барамын. Тамақ рационының сапалы болуы, құнарлы тағам ішуі бала денсаулығының негізгі кепілі.  Барлық санитарлық талапты мектеп басшылығынан бастап, кәсіпкерлер бар барлығыңыз қамтамасыз етулеріңіз тиіс»,-деді.