Жазғы демалыс және мемлекеттік қызмет сапасы қаралды

---

8 маусым күні аудан әкімдігінің кіші мәжіліс залында, Ағзам Нұрғазиннің төрағалық етуімен,  Қоғамдық кеңестің кезекті отырысы болып өтті.

Отырыста: «Аудан мектептерінде оқушылардың жазғы демалысын ұйымдастыру туралы» ауданның оқу бөлімі басшысының есебі  және «Ақтоғай ауданы кәсіпкерлік және ауылшаруашылығы бөлімінің  халыққа мемлекеттік қызмет көрсету сапасын артыру бойынша жұмысы туралы» мәселелер қаралды.

Күн тәртібіндегі бірінші мәселе бойынша  Т.Ябс, аудандық оқу бөлімінің басшысы міндетін атқарушы баяндады. Татьяна Васильевнаның ақпараты бойынша биыл ауданда ұйымдасқан  жазғы демалыс, сауықтыру және жұмыспен қамту бойынша 1905 бала қамтылады, яғни барша оқушылардың 100%. Ауданның 23 мектебінде,  жалпы саны 705 баланы қамтитын, 1-4 сынып оқушыларына арналған мектеп жанындағы лагерлер ұйымдастырылған болса, 5-10 сыныптардың 972 оқушысын қамтитын бейіндік алаңдар жұмыс істейді. Сонымен қатар 150 оқушы екі ауысымда аудандық «Ақтоғай» лагерінде демалатын болады. Кәмелеттік жасқа толған оқушылар  «Жасыл ел» бағдарламасы аясында төленбелі абаттандыру жұмыстарына тартылуда. Сондай-ақ, мектеп оқушылары үшін жаз маусымында облысымыздың түрлі орындарына саяхаттар ұйымдастыру, «Балдәурен» лагеріне жіберу және тағы да басқа шаралар қарастырылған.

Мәселені талқылау барысында Қоғамдық кеңес мүшелері бірқатар сұрақтар мен ұсыныстар айтты. Оның ішінде С.Ермоленко, Б.Бакибаев балалардың жазғы демалысы қауіпсіздігін қамтамасыз ету жұмыстарына, әсіресе автокөлік, мотоциклдермен жүру қауіпсіздігі, су айдандарындағы қауіпсіздік шаралары туралы айтса, А.Нұрғазин, Қ.Қарағұжинова, Ж.Ташенев көше қауіпсіздігі, тамақтануға қаражаттың жеткілікті мөлшерде болуы, облыстың басқа аймақтарындағы лагерлерге балаларды жіберу сияқты мәселелерді қозғады. Сонымен бірге С.Ермоленко туған ауданымыздың аумағындағы тарихи, танымдық жағынан пайдалы жерлерге саяхат ұйымдастыру туралы ұсынысын жеткізді.

Қойылған сұрақтарға Т.Ябс, жергілікті полиция қызметі бөлімінің бастығы М.Жаншоков, Ақтоғай ауылдық округі әкімі Қ.Пістебаев жауап және түсініктеме берді.  Баршаның пікірі бойынша балалардың жазғы демалысы қауіпсіз және мағыналы өтуі үшін құзырлы органдармен қатар ата-аналар, қоғам белсенділері күш салуы қажет.

Қаралған мәселе бойынша Қоғамдық кеңес тиісті ұсыныстар қабылдады.

Күн тәртібіндегі екінші мәселе бойынша  А.Абылшаиқов, кәсіпкерлік және ауылшаруашылығы бөлімі  басшысы міндетін атқарушы баяндады. Бөлім ағымдағы жылдың бірінші тоқсанында 154- мемлекеттік қызмет, оның ішінде 143 – электронды форматта және 11- қағаз нысанында көрсеткен.  Жалпы барлық көрсетілген мемлкеттік қызметтің 134-і жеке тұлғаларға және 20-сы заңды тұлғаларға көрсетілген. Мемлекеттік қызмет көрсетуде регламент пен қағидалардан ауытқу, қызмет көрсету мерзімін бұзу сияқты фактілер тіркелмеген.

 Кеңес мүшелері мемлекеттік қызмет көрсетушілердің еңбек демалысына немесе ауырып қалған жағдайда алмастырушы мамандар бар ма, ауылшаруашылығы техникалары техникалық байқау барысында өрт қауіпсіздігін сақтау бойынша жабдықтары тексерілеме деген сауалдар қойды.

Баяндамашының айтуынша бүгінгі күні мемқызмет көрсететін маманды алмастырушы адам жоқ, бірақ жуыр арада бөлімге инспектор лауазымына қызметкер қабылданып, сол маман алмастыратын болады. Өрт қауіпсіздігі ережелерін сақтау және жабдықтау бойынша техникалық байқау барысында талаптар қойылатыны туралы да айтып өтті.

Қаралған мәселе бойынша ұсыныстар қабылданды.

 

Шайахмет САДУАҚАСОВ, Қоғамдық кеңес хатшысы