Жерді нысаналы пайдалану басты назарда!

---

30 қарашада Жамбыл аудандық Қоғамдық кеңесінде облыстық Қоғамдық кеңес мүшелерінің қатысуымен көшпелі отырыс өтті.

Аталған кеңеске облыстық Қоғамдық кеңестің төрағасы Марат Абдраимов, кеңес хатшысы Жанар Рымбекқызы Орынбаева, кеңес мүшелері Әуезхан Зәуірбеков, Сәлкен Жартыбаев арнайы қатысты. Жиын қатысушыларының қатарында Жамбыл ауданы әкімінің орынбасары Ербол Жиенқұлов, аудандық Қоғамдық кеңес мүшелері мен ауылдық округ әкімдері де болды.

Отырысты жүргізген аудандық Қоғамдық кеңестің төрағасы Рүстем Бегалиев күн тәртібі бойынша жер қатынастары саласын зерделеу қорытындысы туралы мәселе жан-жақты қаралатынын жеткізді.

Кеңес отырысында жұмысшы тобының жетекшісі Өңгер Ботаев зерделеу барысында анықталған кемшіліктерді атап өтті.

Аудан әкімдігінің жер қатынастары бөлімінің ресми деректері негізінде  аудан аумағы 430 954 га құрайды, оның ішінде ауыл шаруашылығы жерлері 241 044 га (57 662 егістік о.і. 29 126 суармалы егістік, 1268 га көп жылдық екпелер, 7778 га шабындық, 177 020 га жайылымдық, 1299 га бөгде жер), елді мекендер 38 099 га, өндірістік мақсаттағы жерлер 9 965 га, орман қорының жер 125 787 га, су қорының жері 1220 га, жер қорындағы жерлер 14 839 га. Ауданда 4 өндірістік кооператив, 3 199 шаруа қожалықтары тіркелген.

Аудан аумағынан инвестициялық жобаларға және ауыл шаруашылық өндірісін жүргізуге берілген жерлер өз мақсатына сай пайдаланбай жатқандығы анықталып отыр. 
Айталық, Ерназар ауылдық округі аумағындағы «Торанғылы» мемлекеттік жер қоры учаскесі жерінен «Тараз» әлеуметтік-кәсіпкерлік корпорациясы» АҚ-на қарқынды бақтар өсіру және жеміс-жидек өнімдерін өсіру үшін уақытша өтеулі жер пайдалану (жалдау) құқығы 20 жыл мерзімге берілген жалпы көлемі 1066,1507 гектар;
Ерназар ауылдық округі аумағындағы «Торанғылы» мемлекеттік жер қоры учаскесі жерінен «Көкжиек-2030» ЖШС-не ауыл шаруашылығы өндірісін жүргізуге берілген көлемі 247,86 гектар жер учаскелері.

Бүгінгі күнге өз мақсатында сай пайдаланылмай жатқан жерлер мемлекет меншігіне қайтарылды. 
Сондай-ақ, зерделеу барысында  аудан аумағындағы ауыл шаруашылығы мақсатындағы 9 жер пайдаланушыларға жалпы көлемі 997,59 гектар жер учаскелеріне шаруа қожалығын жүргізуге берілген жерлердің пайдалану мерзімі өтіп кеткендігі анықталды.
Жамбыл ауданы әкімдігінің 04.11.2022 жылғы №558 қаулысымен қайтыс болған азаматтардың жалпы көлемі 1456,59 га құрайтын  96 жер учаскесін иесіз мүлік ретінде есепке алынған. Жер бөлімі тарапынан аталған жер учаскелерін мемлекет меншігіне қайтару үшін талап арыз аудандық сотқа әзірленуде.

Отырысқа қатысқан аудан әкімінің орынбасары Ербол Жиенқұлов жұмысшы тобының зерделеу жұмыстары барысында анықталған кемшіліктер қолданыстағы заңнама аясында қарастырылып, алдағы уақытта Қоғамдық кеңес ұсынымдары аталған мәселелерді шешуге оң ықпалын тигізетініне тоқталды. Жиында ауданға қарасты 17 округтің әкімдері, ауданның белсенді азаматтары жерді ұтымды әрі тиімді пайдаланудың ауыл шаруашылығын дамытудағы маңыздылығын баса айтты.