Тараз қаласының 2024 жылға арналған бюджетінің жобасы қоғамдық тыңдауға арқау болды

---

«Әлеуметтік әлжуаз топтарды тұрғын үймен қамтамасыз етуге бөлінген қаражат игерілмей қалып отыр. Алдағы жылы да осы бағыттағы жүздеген миллион қаражат игерілмей қалу қаупі жоқ емес. Неге? Осы жылы 40-ақ пәтер сатып алынған. Сонда кезектегі азаматтардың кезегі қашан, қай жылы түгесіледі. Үміттеріне қанша жылдан кейін қол жеткізеді мұндай темппен.

Құмшағал ғой әлі сусыз отыр. Алдағы жылы да шешілмейді деп ойлаймын. Қала аумағындағы зираттарды қоршау ісі де толыққанды шешімін таппай келеді.

Жасыл желек мәселесі де өзекті күйде қалып отыр. Химпром жаққа өзіміз қатысып егілген ағаштар да қараусыз қалып, халі мүшкіл күйге айналды. Жалпы жасыл желектің ахуалын  куәландыратын құжатты, яғни акті, хаттаманы ешкім ұсына алмайды. Бақылау жоқ. Жұмсалған ақша құмға сіңген су секілді. Осындайдан билікке деген халықтың сенімі жоғалады. Бюджет қаражатына деген тиісті бақылаудың жоқтығын байқауға болады.», - деп қоғам қамына бағытталған уәжін, базынасын Тараз қалалық Қоғамдық кеңестің төрағасы Сембек Әбетайұлы Сейдәзімов  кеңестің ұйымдастыруымен өткен «Тараз қаласының 2024 жылға арналған бюджетінің жобасы туралы» қоғамдық тыңдауда жергіліктің биліктің назарына ұсынды.

         Одан да өзге мәселелерге тоқталған Қоғамдық кеңес мүшелері санитарлық тазалық, тұрмыстық қатты қалдықтарды игеру бойынша арнайы бағдарлама қабылдау, канализациялық қақпақтардың қолды болуымен күресті күшейту, темірлерін полимерлік түрлеріне ауыстыру, жастар арасындағы синтетикалық есірткі қолдану, теріс діни ағымдарға елтушілікпен күрес, жанұялық құндылықтарды қызғыштай қорғау, қаржыландыруды ұлғайту, жас отбасыларға медиациялық көмек көрсетуді жолға қою, қаланың биологиялық демін жақсартатын арық-атыздарды тазалау, қалпына келтіру, қалаға жаңадан қосылған аумақтарға «жедел жәрдем» қызметінің кедергісіз, шұғыл жетуін қамтамасыз етуде мекенжайлық адрестер жаңғыртылған жаңа электрондық картаны іске қосу, бюджет қаражатының шынайы қажеттілікке бағытталуы әрі мақсатты жұмсалуын және т.б. өзекті тұстарды тілге тиек етті.

         Тыңдауда сөз алған қала тұрғындары да, белсенділер де облыс орталығының 28 саяжай аумағын түгелдей дерлік қоғамдық, мәдени-спорттық нысандармен қамтуды, қоғамдық орындардағы тазалықты жүргізудегі қарапайым азаматтардың еңбегін билік тарапынан қолдап, қолпаштап отыру қажеттілігіне тоқталды.