Денсаулық бәрінен маңызды

---

ДЕНСАУЛЫҚ БӘРІНЕН МАҢЫЗДЫ

Қосшы қаласының тұрғындары үшін жедел-жәрдем қызметінің жай-күйін жақсарта түсу айырықша маңызға ие. Көптеген тұрғындардың шағымдары нәтижесінде 2023 жылдың 19 қыркүйегінде Қоғамдық кеңес өкілдері мекемеде болып, қызметкерлердің жай-күйімен танысып қайтқан болатын.

Кеңес мүшелері жедел-жәрдем станциясындағы мәселенің күрделі екенін түсіне отырып, оны мейілінше тезірек шешуді қолға алды. Қоғамдық кеңестің бірнеше отырысында осы мәселе қаралып, тиісті мекемелерге, тұлғаларға (Ақмола облыстық денсаулық сақтау басқармасының басшысы Н.С. Ақылбековке, Ақмола облыстық мәслихатының депутаты Айдын Төребаевқа) хат та жолданған еді. Сондай-ақ 29 қараша күні өткен отырыста Ақмола облыстық жедел медициналық жәрдем станциясының директоры Р. Садырқожаұлы баяндама жасап, Қосшы қаласының халқына жедел медициналық көмек көрсету туралы қойылған сауалдарға жауап берген болатын.

Өткен отырыстар бойынша Қоғамдық кеңестің хаттамасы жасалып, облыстық денсаулық сақтау басқармасына жіберілген. Қаламыздан облыстық мәслихатқа сайланған депутат Айдын Бертісбайұлы да бұл мәселені облыстық мәслихаттың сессиясында көтеріп, депутаттық сауалдар жолдап мәселенің оң шешілуіне ықпал етуде.

Атқарылып жатқан жүйелі жұмыстардың нәтижесінде Ақмола облысының денсаулық сақтау басқармасынан Қосшы қаласының №1 емханасына жедел жәрдем көлігі мен жеңіл автокөлік берілді. Бұл - аз да болса қала тұрғындарының сапалы медициналық қызметке қол жеткізуіне өз септігін тигізеді. Қоғамдық кеңес мүшелерінің осы бағыттағы жұмыстары алдағы уақытта да жалғасын тауып, бұл мәселе толықтай шешімін тапқанша назардан тыс қалмайды.