Аймақ басшысы Жамбыл облыстық Қоғамдық кеңес мүшелерімен кездесті

---

Кеше өңір басшысы Ербол Қарашөкеев облыстық Қоғамдық кеңестің 3-ші құрамымен кездесу өткізді. 

Жиында Қоғамдық кеңес төрағасы Марат Абдраимов “Қоғамдық кеңестер туралы” Заңға сәйкес кеңестің 2023 жылы атқарған жұмыстарын баяндап, 2024 жылдың басым бағыттарына тоқталып өтті. 

Есепті кезеңде кеңестің 48 отырысы, 30 қоғамдық тыңдау, 28 есепті тыңдау, 15 қоғамдық мониторинг жүргізілгені, нәтижесінде мемлекеттік органдардың қызметін жетілдіру жөнінде 53 ұсыным әзірленіп, жолданғаны баяндалды.

 Заңға сәйкес Қоғамдық кеңес ұсынымдары мемлекеттік органдардың қарауы үшін міндетті болып есептелетініне тоқталған кеңес төрағасы басқармалар тарапынан жолданған ұсынымдарға уәжді жауаптар берілмейтінін атап айтты. 

 Кездесуде облыс әкімі Ербол Шырақпайұлы өңірде туындаған мәселелерді талқылап, кеңес мүшелерінің ұсыныс-пікірлерін тыңдау қордаланған мәселелерді шешуге оң септігін тигізетініне сенім білдірді. 

 Облыс әкімі өңірдің әлеуметтік-экономикалық даму көрсеткіштері және алдағы уақытта атқарылатын жұмыстар туралы кеңес мүшелеріне кеңірек баяндап берді.

 Президент Жарлығымен жоспардың іске асырылуына жүргізілетін мониторинг арқылы әкімдік қызметінің тиімділігі бағаланатынын атап өткен өңір басшысы Ербол Қарашөкеев мемлекеттік органдар қызметінің ашықтығын қамтамасыз ету міндеті жүктелген Қоғамдық кеңес мүшелерін осы мақсатта бірлесе жұмыс атқаруға шақырды.