Сәтбаев қаласы Қоғамдық кеңесінің кезекті отырысы

---

2024 жылғы 28 ақпанда Имамбай С.С. төрағалығымен қалалық қоғамдық кеңестің кезекті отырысы өтті. Күн тәртібі бойынша 3 мәселе қаралды.

Бірінші сұрақпен кеңес мүшелері «Сәтбаев қаласының тұрғын үй инспекциясы бөлімі» ММ басшысы Ж.С.Сейлованың тұрғын үй қорын сақтау және тұрғын үйлерді басқарудың жаңа нысандарына көшу жөніндегі жұмысы туралы ақпаратын тыңдады. Бөлім жеке инвестицияларды тарту есебінен қаланың тұрғын үй қорын жаңғырту, кондоминимум объектілерін басқарудың жаңа нысандарын енгізу бойынша жұмыстар жүргізуде. Тұрғын үй-коммуналдық қатынастар саласын цифрландыру үшін және МИБ тұрғындарының барлық міндеттерін ыңғайлы және тиімді шешу үшін «Управдом» сервистік қосымшасы енгізілген. Бірақ барлық тұрғындар бұл саладағы жаңашылдықтар туралы хабардар емес, түсіндіру жұмыстарын күшейту қажет. Қоғамдық кеңес мүшелері үйлердің шатырлары мен қасбеттерін ағымдағы жөндеу бойынша өз ескертулерін білдірді. Биылғы жылы қалалық бюджет қаражатынан 25 көпқабатты тұрғын үйдің шатырына жөндеу жүргізілетін болады, тексеру және бақылау жүргізу үшін кеңес мүшелері, депутаттар мен мамандардан құралатын арнайы комиссия құру қажет.

Келесі мәселемен «Сәтбаев қаласының жұмыспен қамту және әлеуметтік бағдарламалар бөлімі» ММ басшысының орынбасары Қ.Б.Ашықбаевтың  «Сәтбаев қаласында тұрғын үй көмегін көрсетудің мөлшері мен тәртібін анықтау туралы» НҚА жобасы қаралды.

Отырыс күн тәртібінің үшінші мәселесі бойынша кеңестің шығып қалған мүшесінің орнына резервтік тізімнен Ұ.Е.Қапарова енгізілді.