Тараз қаласының әкімі Б.Ә.Орынбеков қалалық Қоғамдық кеңес мүшелерінің алдында атқарылған жұмыстар және алдағы жоспарларымен бөлісті

---

Сондай-ақ басқосуға қалалық мәслихаттың төрағасы К.М.Олжабай және бөлім басшылары, қала әкімінің аумақтық бас инспекторлары мен БАҚ өкілдері қатысты.

Қала әкімі алдымен Тараздың 2023-2025 жылдарға арналған даму картасы аясында атқарылған жұмыстар мен ендігі іске асырылар жоба-жоспарларды кеңінен баяндап өтіп, сосын Қоғамдық кеңес мүшелерінің сұрақтарына жауап берді.

Шаһардың ең өзекті деген сұрақтарын алдын ала зерделеп, құрылымдаған Қоғамдық кеңес мүшелері төмендегідей сауалдарды әкімнің назарына ұсынды:

• Арнайы тұрмыстық қалдықтарды басқару бағдарламасын қабылдау;
• Облыс орталығын жасыл желекке көмкеру, өніп тұрғанына күтімді күшейту, ол үшін жаңа, үнемді суландыру  технологияларын қолдану;
• Арық-атыздарды қалпына келтіру;
• Шаһардың санитарлық-эпидемиологиялық жағдайы, кәріз жүйелерінің ауқымын кеңейту;
• Қоғамдық көлік – автобустар отынын газға көшіру;
• Қызылшаға сырқатына қарсы екпе салу жұмыстарының қарқынын арттыру;
• Жансая мөлтек ауданы мен автобекет маңындағы «Сібір жарасы» ошақтарының қауіпсіз қалпын сақтау, айналасындағы заңсыз құрылыстар мен егістік алаңдарының жайы;
• Сауда базарларын заманауи (өрт және т.б қауіпсіздік талаптарын сақтай отырып, сатушыға да, тұтынушыға да жайлылықты қамтамасыз ету сынды) талаптарға сәйкестендіру;
• Пайдаланымдағы және құрылыстары енді жүргізілетін көп қабатты тұрғын үйлердің сейсмикалық ахуалына жіті назар аудару, жақсарту;
• Заңсыз дүңгіршектер, құрылыстармен күрес, «қызыл сызықтың» сақталмауы;
• Азық-түлік тауарларының бағасын тұрақтандыру, «әлеуметтік дүкендердің» қызметі мен ондағы әлеуметтік тауарлардың сапасын арттыру;
• Қанат жайған нүктелі құрылыстардың орнына «Нүктелі сквер» жобасын іске асыру;
• Жауапты инфрақұрылымдық мекемелердің, кейде азаматтардың жаңадан салынған немесе бүтін асфальт жолдарды апаттық жағдайға, тұрмыстық қажеттілікке байланысты бүлдіріп, артынан сапасыз қалпына келтіріп, зардабын қарапайым көлік жүргізушілерінің қарауына қалдыратыны.  

Қала әкімі қойылған сұрақтардың бірқатары бойынша қазірдің өзінде қолға алынған шаралар туралы мәлімдеп, басқаларын бақылауына алатындығын жеткізді.

Сондай-ақ, жиында сөз алған, қалалық мәслихаттың төрағасы К.М.Олжабай облыс орталығының тыныс-тіршілігіне қатысты көтерілген және туындайтын көкейкесті жағдайларды шешуге қалалық мәслихат депутаттары мен Қоғамдық кеңес мүшелерінің әлеуетін біріктіре жұмылдыру жөнінде ұсыныс білдірді және ол кеңес мүшелері тарапынан қолдау тапты. 

Отырысты қорытындылаған С.Ә.Сейдәзімов Тараздың тартымды келбетін, көне шаһар атына лайық қоғамдық мәдениетті сақтауда тұрғындардың да атқарар рөлінің зор екендігіне тоқталып, белсенді болуға шақырды және шаһар басшысына мұндай жүздесулердің «ашық», «еститін» мемлекетті құрудағы маңыздылығын ескере келе, тоқсанына бір рет ұйымдастырылуына пәрмен берілгені жөн деген ұсынысын айтты.