Туризм және спорт министрлігінің Қоғамдық кеңесінің кезекті отырысы өткізілді

---

Күн тәртібінде дене шынықтыру және спорт саласындағы заңнаманы жетілдіру, халық арасында лудоманияға қарсы іс-қимыл және оның деңгейін төмендету жөнінде қабылданып жатқан шаралар және Қытайдағы Қазақстан туризмі жылын өткізу туралы мәселелер қарастырылды.

Бірінші мәселе бойынша қолданыстағы заңға 163 түзету көзделген.
Іс-шараға қатысушылар олардың ішіндегі ең негізгілерін талқылады. Атап айтар болсақ, спорт түрлеріне басымдық беру, спорт саласындағы басқару институттарының өзара іс-қимылын қайта қарау, спорт резервін даярлауды жетілдіру, сондай-ақ спорттық даярлықтың ұлттық стандарттарын әзірлеу және бекіту, спорттық медицинаны дамыту, кәсіби спорт клубтарын ұстауға арналған лимиттерді бекіту.

Сонымен қатар талқылауда заңнаманы бұзғаны үшін жауапкершілікті күшейту, сондай-ақ лудоманияның алдын алуға бағытталған заңнамалық түзетулер қаралды. Мәселен, букмекерлік кеңселер мен тотализаторларды жарнамалауға тыйым салу, Борышкерлердің бірыңғай тізіміндегі адамдардың құмар ойындары мен бәс тігулеріне қатысуға тыйым салу, өзін-өзі шектеген адамдарды құмар ойындар мен бәс тігуге қатысуына рұқсат бергені үшін жауапкершілікке тарту, интернет-казино қызметін ұйымдастырғаны үшін қылмыстық жауапкершілік енгізу, ойын бизнесін ұйымдастырушы тарап жұмысының үлгілік қағидаларын бекіту, тұрғын үйлерде, жатақханаларда, мәдениет, білім беру, денсаулық сақтау объектілерінде лотерея терминалдарын орналастыруға тыйым салу, шетелдік ойын бизнесін ұйымдастырушылардың пайдасына төлемдерді жүзеге асыру бойынша қызмет көрсетуге тыйым салу, Мемлекеттік кірістер органдарының ақпараттық жүйесіне букмекерлердің аппараттық-бағдарламалық кешендерін интеграциялау.

Мемлекет басшысының тапсырмасы бойынша Қытайдағы Қазақстан туризмі жылын өткізу – биылғы жылдың басым міндеттерінің бірі.
Іс-шараның салтанатты ашылу рәсімі 29 наурызда Бейжіңде ұйымдастырылған болатын. Еліміздің туристік әлеуетін таныстыруға бағытталған 35-тен астам түрлі форматтағы іс-шаралар өткізу жоспарланған.