САЛЫҚ ТҮСІМДЕРІН АРТТЫРУДЫҢ ҚАЛАМЫЗДЫҢ ДАМУЫ ҮШІН МАҢЫЗЫ ЗОР

---

Қосшы қаласы Қоғамдық кеңесінің (18 сәуір, 2024 ж) соңғы отырысында салықтық әкімшілендіруді жақсарту шаралары және қала бюджетінің кірістерін ұлғайту бағытында атқарылған жұмыс туралы мәселе қаралды.

Бұл тақырып бойынша Мемлекеттік кірістер басқармасы басшысының орынбасары Абай Қамажан хабарлама жасап, атқарылып жатқан жұмыстар туралы нақты мәліметтерімен бөлісті.

Абай Болатұлының дерегі бойынша 2023 жылдың басынан бері (жылдың басында - 3 млрд. 658,6 млн.тг. болатын) мемлекеттік бюджет бойынша болжам 1 млрд. 666,8 млн. теңгеге ұлғайтылып, 5 млрд. 325,4 млн.тг. құраған. Яғни, 45,6 %-ға өскен.

Дегенмен, салықты уақытында төлеу бойынша қажетті шаралар әлі де жүзеге асып жатыр. Салық органы жеке тұлғалардың салық берешегін өндіріп алу бойынша Полиция басқармасы және жеке сот орындаушыларымен бірлесіп 72 рейдтік іс-шара өткізген. Нәтижесінде 2023 жылдың басынан Қосшы қаласы бойынша МКБ жергілікті салықтар бойынша берешегі бар салық төлеушілерден 4,5 млн.тг. өндірген.

Осы орайда салық төлеуден жалтарушыларды әкімшілік жауапкершілікке тарту арқылы салық түсімдерін өндіріп алу жүзеге асатыны белгілі. Өткен жылдың (2023 ж) қорытындысы бойынша 605 әкімшілік материал толтырылып, онда салынған айыппұлдар саны 11,3 млн.тг. Құраған. Оның, 99,2% өндіріліп алынған (11,2 млн.тг).

Қаламыз көркейіп, гүлденуі үшін салық төлеуге де жауапкершілікпен қарауымыз қажет. Салық төлеу - дүние мүлкімізді Қосшы қаласына тіркеу, салықтық төлемдерді уақытында жүзеге асырудан басталады.