Қоқыс мәселесі қаралды

---

18 сәуір күні Қоғамдық кеңес отырысында қаралған мәселенің бірі - қоқыс (ҚТҚ) шығару туралы болды. Қала тұрғындарының жиі шағымданатын мәселесінің бірі қоқыс контейнерлері, қоқыс шығарудағы сапасыз қызмет көрсету жайлы болғандықтан жиынға бұл жұмыспен айналысатын “SAF – 2023” ЖШС-нің басшылары шақырылған болатын.

Компанияның директоры Дияс Жанұзақтың айтуынша Қосшыда 204 бірлік (темірден жасалған) қоқыс контейнері орнатылған және компанияның өз қаражаты есебінен әкімдіктің меншігі болып табылатын 250 бірлік мөлшеріндегі қоқыс контейнерлері жөнделген. Әрі қоқыс сыртқа ұшып кетпеуі үшін үш жағынан қоршалған. Келісімшарт бойынша міндеттемелерді орындау шеңберінде “SAF – 2023” ЖШС 2022 - 2023 жылдары жылына 100 пластик контейнерден қойған. Отырыс барысында компания өкілдері көптеген тұрғын үй кешендері аумағына қоқыс контейнерлерін орнатқанын, қала бойынша тәулігіне 41 тоннадан астам қоқыс шығаратынын жеткізді.

Қоғамдық кеңес мүшелері жеке адам басына қоқыс тарифінің (532,66 тг) Қазақстан бойынша ең жоғары тариф екенін, контейнерлердің саны әдеттегі көрсеткіштен аз екенін, сөйте тұра жауапты компания өз қызметін жүзеге асыруда сапалы жұмыс жасай алмай отырғанын сынға алды.

Кеңес мүшелері жүргізген мониторингтердің нәтижесінде көпқабатты тұрғын үй кешендерінің аумағынан бөлек, жеке сектордағы қоқыс жәшіктерінің уақытында шығарылмауы салдарынан желге ұшқан қоқыс қалдықтары қаланы ластап жатқаны анықталған. Және бұл мәселенің жиі қайталануы “SAF – 2023” ЖШС жұмысына тұрғындар тарапынан арыз-шағымның көбейіп кетуіне алып келді.

Қоғамдық кеңес өкілдері мердігер компанияға тендердің қорытындысы бойынша жасалған келісім шарттың талаптарын орындауы міндетті екендігін ескертті. Компания бүгінгі күнге дейін жеке сектор тұрғындарымен толық келісім шарттар жасамаған. Оның салдарын контейнерлердің жетіспеушілігімен түсіндіреді. Әрине, бұл тек қана - сылтау екені сөзсіз..

Өз кезегінде Қоғамдық кеңес мүшелері еліміздегі ірі қалалардағы тазалық жұмыстарының жүргізілу барысын тәжірибе ретінде пайдалану керектігіне назарға аудартты. Дегенмен, мердігер компания келісім шартта белгіленген міндеттерін толық орындамаған жағдайда тапсырыс беруші келісім-шартты тоқтатуға құқылы екендігін біле тұра, неге әлі күнге дейін қажетті шара қолданылмайтындығы түсініксіз..

Тазалық - қала келбетінің көрінісі. Елорданың іргесінде орналасқан Қосшының лас-қоқысқа айналуы әр түрғынды алаңдататыны анық. Бұл мәселе Қоғамдық кеңестің күн тәртібінен түспейді, алдағы уақытта да кеңес мүшелерінің назарында болады.